MCA च्या अध्यक्षपदी निवड झाल्याबद्दल नीतेश राणे यांनी रोहित पवारांचं अभिनंदन केलं खरं, पण…

महाराष्ट्र क्रिकेट असोसिएशनच्या (Maharashtra Cricket Association) अध्यक्षपदी राष्ट्रवादी काँग्रेसचे आमदार रोहित पवार (Rohit Pawar) यांची निवड झाली आहे. या निवडीबद्दल त्यांच्यावर अभिनंदनाचा वर्षाव होत आहे. पवार कुटुंबीयांवर नेहमीच टीकेच्या तोफा डागणारे भारतीय जनता पक्षाचे आमदार नीतेश राणे यांनी या निवडीबद्दल रोहित पवारांचं अभिनंदन केलं आहे. त्याचबरोबर रोहित पवारांना बोचरा टोलाही हाणला आहे.

रोहित पवार यांच्या निवडीच्या पार्श्वभूमीवर नीतेश राणे यांनी एक ट्वीट केलं आहे. त्यात ते म्हणतात, ‘महाराष्ट्र क्रिकेट असोसिएशनच्या अध्यक्षपदी आमदार रोहित पवार यांची बिनविरोध निवड झाली. त्यांचं अभिनंदन, पण अध्यक्षपदी निवड होण्यामागे नेमकं त्यांचं क्रिकेटमध्ये योगदान काय हे समजलं नाही. त्यांच्या आजोबांनी क्रिकेटमध्ये चीअरलीडर्स आणल्या हे महाशय काय आणतात बघूया.’

Marathi News 9 January 2023 Live: नवाब मलिक यांच्या जामीन अर्जावर सुनावणी

रोहित पवार यांचे आजोबा अर्थात, राष्ट्रवादी काँग्रेसचे अध्यक्ष शरद पवार (Sharad Pawar) यांनी आजवर क्रीडा क्षेत्रातील अनेक संघटनांचं नेतृत्व केलं आहे. क्रिकेट संघटनांच्या राजकारणात तर त्यांनी थेट आंतररराष्ट्रीय पातळीपर्यंत 'बॅटिंग' केली आहे. त्यांनी बीसीसीआय व आयसीसीचंही अध्यक्षपद भूषवलं आहे. शरद पवार यांच्या कार्यकाळात क्रिकेटमध्ये अनेक बदल झाले. वेगवेगळ्या प्रकारच्या क्रिकेटच्या फॉरमॅटमुळं या खेळाची लोकप्रियता अनेक पटींनी वाढली. मागील काही वर्षांपासून मात्र ते क्रिकेट संघटनांपासून दूर होते. आता रोहित पवार यांच्या रूपानं शरद पवार अप्रत्यक्षपणे का होईना पुन्हा मैदानात उतरले आहेत. हाच धागा पकडून नीतेश राणे यांनी रोहित पवार यांना उपरोधिक टोला हाणला आहे.

Pune Viral Video: पुण्यात शेतीचा वाद टोकाला! पुतण्यावर रॉकेल ओतत हाती टेंभा घेऊन काकाचा जीवे मारण्याचा प्रयत्न

रोहित पवार यांच्या बरोबरच एमसीएचे उपाध्यक्ष म्हणून किरण सामंत, सचिव म्हणून शुभेंद्र भांडारकर, सह-सचिव म्हणून संतोष बोबडे आणि खजिनदारपदी संजय बजाज यांची निवड झाली आहे.