YES Bank-DHFL Fraud: संजय छाब्रिया, अविनाश भोसलेंची ४१५ कोटींची मालमत्ता जप्त

YES Bank-DHFL Fraud: येस बँक DHFL फसवणूक प्रकरणी ईडीने मोठी कारवाई केली असून संजय छाब्रिया यांच्यासह अविनाश भोसले यांची मालमत्ता जप्त केली आहे. संजय छाब्रिया यांची २५१ कोटी रुपयांची तर अविनाश भोसले यांची १६४ कोटी रुपयांची असी मिळून एकत्रित ४१५ कोटी रुपयांची मालमत्ता ईडीने जप्त केली आहे. पीएमएलए कायद्यांतर्गत ही कारवाई ईडीने केली आहे. याआधीच या प्रकरणी रेडियस डेव्हलपर्सचे संजय छाब्रिया आणि पुण्यातील बांधकाम व्यावसायिक अविनाश भोसले यांना ईडीने अटक केली आहे. 

ईडीने जप्त केलेल्या मालमत्तांमध्ये संजय छाब्रिया यांची मुंबईतील सांताक्रूझ येथील ११६.५ कोटी रुपयांच्या मालमत्तेचा समावेश आहे. तसंच सांताक्रूझमधील ३ कोटी रुपयांचा फ्लॅट, दिल्ली विमानतळावरील हॉटेलमधील १३.६७ कोटी रुपयांचा नफा, तीन लक्झरी कार ज्यांची किंमत जवळपास ३.१० कोटी रुपये इतकी आहे. याशिवाय पुण्यातील व्यावसायिक अविनाश बोसले यांचा मुंबईतील १०२.८ कोटी रुपयांचा डुप्लेक्स फ्लॅट. पुण्यातील १४.६५ आणि २६.२४ कोटी रुपयांची जमीन, नागपूरमधील १५.५२ कोटी आणि १.४५ कोटी रुपयांची जमीन जप्त करण्यात आली आहे. 

ईडीने येस बँकेचे राणा कपूर आणि डीएचएफएलचे कपिल वाधवन आणि धीरज वाधवन यांची चौकशी सुरू केली आहे. सीबीआयने दाखल केलेल्या गुन्ह्याच्या आधारेच ही चौकशी केली जात आहे. राणा कपूरने डीएचएफएलच्या कपिल वाधवन आणि इतरांसोबत डीएचएफएलला येस बँकेकडू अर्थसहाय्य देण्यासाठी गुन्हेगारी कट रचल्याचा आरोप करण्यात आला आहे. 

सीबीआयने नुकतंच डीएचएफएल प्रकरणी अविनाश भोसले यांच्यावर कारवाई केली होती. यात अविनाश भोसले यांचे ऑगस्टा वेस्टलँड हेलिकॉप्टर जप्त करण्यात आलं होतं. २०११ मध्ये हे हेलिकॉप्टर ३६ कोटी रुपयांना वर्वा एव्हिएशनने विकत घेतल्याचा आरोप असून या एव्हिएशनचा मालकी हक्क असोसिएसन ऑफ पर्संस यांच्याकडे आहे.