Dasara Melava: मोदींना सांगायला हवं, पंकजा मुंडेंच्या एका ट्विटवर लाखो लोक येतात - महादेव जानकर

Dasara Melava: भाजप नेत्या पंकजा मुंडे यांनी भगवानगडावर दसरा मेळावा घेतला. या मेळाव्याला खासदार प्रीतम मुंडे, खासदार सुजय विखे पाटील, शिवाजी कर्डिले, महादेव जानकर हे नेते उपस्थित होते. महादेव जानकर यांनी मेळाव्याला आलेली लोकं पैसे देऊन नाही तर पदरमोड करून आल्याचं म्हटलं. ते म्हणाले की, मी भाजपचा माणूस नाही तर मित्रपक्ष आहे. जर पंकजा मुंडे आणि महादेव जानकर नसेल तर तुमचं काही खरं नाही. माझी सुजय विखे आणि प्रीतम मुंडेंना विनंती आहे की, तुम्ही दिल्लीचे, खासदार इथं आहात, तुम्ही आमचे शब्द दिल्लीला घेऊन जा.

मेळाव्याला आलेली माणसं ही पैसे देऊन आलेली नाहीयेत. ती आपली पदरमोड करून इथं आली आहेत. काही मुंबईवरून तर काही गुजरातवरून आले आहेत असंही महादेव जानकर म्हणाले. सुजय विखे पाटील यांचे नाव घेत महादेव जानकर यांनी म्हटलं की, तुम्ही दिल्लीत असता, तर मोदींना सांगायला हवं की, पंकजा मुंडेंच्या एका ट्विटवर लाखो लोक गोळा होतात. मंत्रिमंडळात त्यांना स्थान द्यायचा प्रयत्न करावा. असं केलं तर विखेंचाच पक्ष मोठा होईल. प्रीतम मुंडेंनीही सांगावं की आम्ही इथं उभा आहे म्हणून तुम्ही दिल्लीतील माणसं आहात, तुम्ही दोघं खासदार आहात.

पंकजा मुंडे यांनी नाराजीच्या चर्चेवर मौन सोडलं असून त्यांनी म्हटलं की, इथं कुणीही नाराज नाहीय. कोणाची अवहेलना, अपमान करू नका. माझी ही इच्छा आहे. इतके दिवस मी मौन बाळगलं कारण माझा तसा स्वभाव नाही. नाराजीचा विषय माझ्याकडून संपला आहे. ज्यांना मंत्री करायचं ते करतील आपण २०२४ च्या तयारीला लागायला हवं असं पंकजा मुंडे म्हणाल्या.

पंकजा मुंडे म्हणाल्या की मी तुमच्यासाठी रोज मैदानात असेन. गोपीनाथ मुंडेंच्या नावाला बट्टा लागेल असं वागणार नाही. मी उतणार नाही, मातणार नाही, घेतला वसा टाकणार नाही. जितना बदल सकते थे खुद को बदल दिया हमने. अब जिनको शिकायत हे वह खुद को बदले असंही त्यांनी म्हटलं.