LLC 2022: मिचेल जॉन्सन-यूसुफ पठाण यांच्यात जोरदार राडा, धक्काबुक्कीचा व्हिडीओ व्हायरल

लीजेंड्स लीग क्रिकेट स्पर्धेचा पहिला क्वालिफायर सामना इंडिया कॅपिटल्स आणि भिलवाडा किंग्ज यांच्यात जोधपूरमध्ये खेळला गेला. गौतम गंभीरच्या नेतृत्वाखालील इंडिया कॅपिटल्सने हा सामना ४ गडी राखून जिंकला आणि फायनलमध्ये प्रवेश केला.

दरम्यान, या सामन्यात दोन्ही संघांच्या खेळाडूंमध्ये जोरदार बाचाबाची झाली. या घटनेचा एक व्हिडिओही सोशल मीडियावर मोठ्या प्रमाणात व्हायरल होत आहे. ज्यामध्ये भिलवाडा किंग्जचा युसूफ पठाण इंडिया कॅपिटल्सचा वेगवान गोलंदाज मिचेल जॉन्सन धक्काबुक्की करताना दिसत आहेत.

व्हायरल व्हिडिओमध्ये सुरुवातीला युसूफ पठाण आणि मिचेल जॉन्सन यांच्यामध्ये शाब्दिक चकमक पाहायला मिळत आहे. काही सेकंदांनंतर दोन्ही खेळाडू एकमेकांच्या जवळ येऊन धक्काबुक्की करताना दिसत आहेत. यानंतर जॉन्सन हसत निघून जातो. यादरम्यान संघातील इतर खेळाडू आणि पंचांनी मध्यस्थी करत प्रकरण मिटवण्याचा प्रयत्न केला.

भिलवाडा किंग्जने प्रथम फलंदाजी करताना ५ बाद २२६ धावा केल्या होत्या. जे इंडिया कॅपिटल्सने ३ चेंडू बाकी असताना ६ गडी गमावून पूर्ण केले. नर्सने श्रीसंतच्या चेंडूवर षटकार मारून इंडिया कॅपिटल्सला फायनलमध्ये पोहोचवले. इंडिया कॅपिटल्सकडून रॉस टेलर (८४) आणि कॅरेबियन दिग्गज अॅश्ले नर्स (नाबाद ६०) यांनी शानदार खेळी केली.