Pune : दुर्दैवी ! बाराव्या मजल्यावरून पडल्याने पिता-पुत्राचा मृत्यू; आत्महतेचा संशय
Pune News : वाकड येथील एका सोसायटीच्या १२ व्या मजल्यावरून पडून पिता पुत्राचा दुर्दैवी मृत्यू झाल्याची घटना पुण्यात घडली आहे.
पुणे : तब्बल बाराव्या मजल्यावरून पडल्याने पिता-पुत्राचा मृत्यू झाला. ही घटना पुण्यातील वाकड परिसरातील ग्रीन पलाश हाऊसिंग सोसायटीत शुक्रवारी सकाळी घडली. आधी मुलाला ढकलुन त्यानंतर वडिलांनी आत्महत्या केली असावी असा प्राथमिक अंदाज पोलिसांनी नोंदवला आहे.
आदेश क्रांती तावडे (वय १६), क्रांती तावडे (वय ४४) अशी मृत्यू झालेल्या दोघांची नावे आहेत. पोलिसांनी दिलेल्या माहितीनुसार, ग्रीन पलाश हाऊसिंग सोसायटी येथे दोघेजण इमारतीवरून खाली पडल्याची माहिती वाकड पोलिसांना मिळाली.
पोलिसांचे पथक तातडीने घटनास्थळी रवाना झाले. यावेळी त्यांना दोघेजण रक्ताच्या थारोळ्यात पडलेले आढळले. दोघांना तात्काळ रुग्णालयात दाखल केले असता उपचारापूर्वीच त्यांचा मृत्यू झाल्याचे डॉक्टरांनी घोषित केले.
मुलगा आदेश याला बाराव्या मजल्यावरून ढकलून देऊन त्यानंतर क्रांती यांनी उडी मारून आत्महत्या केल्याची प्राथमिक माहिती आहे. क्रांती यांचा पत्नी, मुलगी, आई, वडील असा परिवार मागे आहे. क्रांती आणि आदेश मनोरुग्ण असल्याचे देखील म्हटले जाते. वाकड पोलीस तपास करीत आहेत.
विभाग