Tamasha Live Box Office Collection: 'तमाशा लाइव्ह' ते 'हिट', वाचा किती आहे कमाई

लोकप्रिय मराठमोळी अभिनेत्री सोनाली कुलकर्णी (sonalee kulkarni tamasha live box office collection)आणि दिग्दर्शक संजय जाधव यांचा 'तमाशा लाइव्ह' नुकताच चित्रपटगृहात प्रदर्शित झाला आहे. या चित्रपटात एक वेगळा विषय मांडण्याचा प्रयत्न करण्यात आला आहे. पत्रकारितेचा वेगळा चेहरा दाखवणारा 'तमाशा लाइव्ह' १५ जुलै रोजी चित्रपटगृहात प्रदर्शित झाला आहे. त्यासोबत तापसी पन्नूचा 'शाबास मिथू' आणि राजकुमार राव यांचा 'हिट' देखील प्रदर्शित झाले आहेत. या पैकी कोणत्याही चित्रपटाने म्हणावी तशी कमाई केलेली नाही.

कमाईच्या बाबतीत 'तमाशा लाइव्ह' ने पहिल्या दिवशी म्हणजे शुक्रवारी ३० लाखांची कमाई केली आहे. देशभरात २५० स्क्रीनवर हा चित्रपट दाखवण्यात येत आहे. चित्रपटासाठी साधारण ४ ते ५ कोटींचा खर्च करण्यात आला आहे. पहिल्या दिवशीच्या मानाने या चित्रपटाची कमाई चांगली मानली जातेय. आता शनिवारी आणि रविवारी ही कमाई वाढण्याची शक्यता आहे. या पूर्वी प्रदर्शित झालेल्या चित्रपटांच्या कमाईच्या मानाने ही कमाई कमी असली तरी चित्रपटाचा विषय पाहता हा आकडा चांगला मानला जातोय. तर दुसरीकडे 'शाबास मिथू'ने देखील पहिल्या दिवशी काही खास कमाई केली नाही. भारतीय महिला क्रिकेटपटू मिताली राज हिच्या आयुष्यावर आधारीत या बायोपिकने पहिल्या दिवशी केवळ ४० लाखांची कमाई केली आहे.

परंतु, दुसऱ्या दिवशी चित्रपटाच्या कमाईत वाढ झालेली पाहायला मिळाली. दुसऱ्या दिवशी म्हणजे शनिवारी चित्रपटाने ५५ लाखांची कमाई केली आहे. म्हणजे या चित्रपटाने एकूण ९५ लाखांची कमाई केली आहे. रविवारी यात आणखी वाढ होण्याची शक्यता आहे. तर दाक्षिणात्य चित्रपटाचा रिमेक असलेला 'हिट' ने चांगली कमाई करत पहिल्या दिवशी कोटींचा आकडा पार केला आहे. दोन दिवसात याची कमाई १ कोटी ९० लाखांवर पोहोचली आहे. इतर चित्रोताच्या मानाने ही कमाई चांगली आहे.