Z𝖾𝗇𝗂𝗍-𝖲𝗉𝖺𝗋𝗍𝖺𝗄 Clash: फुटबॉल सामन्यात राडा, दोन्ही संघांच्या कोच-खेळाडूंमध्ये हाणामारी

russia cup football fight: कतारमध्ये सध्या FIFA विश्वचषक २०२२ चा थरार सुरू आहे. या स्पर्धेत दररोज रोमहर्षक सामन्यांची मेजवानी फुटबॉल रसिकांना मिळत आहे. पण अशातच रशियामध्ये एका फुटबॉल सामन्यादरम्यान एक असे कृत्य घडले आहे, जे कोणत्याही फुटबॉल चाहत्याला आवडणारे नाही. सामन्यादरम्यान दोन्ही संघांचे खेळाडू एकमेकांना भिडले आणि एकमेकांना लाथा-बुक्क्यांनी जोरदार मारहाण केली. सामनाधिकारी आणि इतरांनी मध्यस्थी करण्याचा प्रयत्न केला, पण सर्व प्रयत्न अयशस्वी ठरले.

रशियन कप फुटबॉल स्पर्धेत रविवारी (२७ नोव्हेंबर) क्रेस्टोव्स्की स्टेडियमवर झेनिट सेंट पीटर्सबर्ग आणि स्पार्टक मॉस्को यांच्यात सामना झाला. या सामन्या दरम्यान दोन्ही संघांच्या खेळाडूंनी सर्व हद्द पार करून मैदानात तुफान राडा घातला. सामन्यादरम्यान भर मैदानात दोन्ही संघांच्या खेळाडूंनी फ्री स्टाईल हाणामारी केली. शेवटी ६ खेळाडूंना रेड कार्ड दाखवून बाहेर पाठवण्यात आले. झेनिट आणि स्पार्टक यांच्यातील सामना पेनल्टी शूटआऊटपर्यंत पोहोचला. यात झेनिटच्या संघाने ४-२ अशा फरकाने विजय मिळवला.

रशियन कपच्या या सामन्यात दोन्ही संघांना एकही गोल करता आला नाही. अशा स्थितीत दोन्ही संघांचे खेळाडू इंज्युरी टाइममध्ये गोल करण्याचा प्रयत्न करत होते. इंज्युरी टाईममध्ये स्पार्टक संघाने त्यांच्या हाफमधून फ्री किक घेतली. यादरम्यान, स्पार्टकचा क्विन्सी प्रोम्स आणि जेनिटचा विल्यम बॅरिओस एकमेकांना धडकले. यावेळी दोन्ही खेळाडूंमध्ये काही संवादही झाला. यानंतर दोन्ही खेळाडू एकमेकांना भिडले. त्यानंतर त्यांचे सहकारी खेळाडू आणि इतर स्टाफही दोघांच्या समर्थनार्थ मैदानात पोहोचले. यानंतर दोन्ही संघांमध्ये तुफान हाणामारी झाली. या घटनेचा व्हिडिओ सोशल मीडियावर व्हायरल होत आहे.

फुटबॉलच्या मैदानावरील हे खूपच निराशाजनक होते. या लढतीदरम्यान रेफ्री एकामागून एक खेळाडूंना रेड कार्ड दाखवत होते. त्यांनी एकामागून एक सलग ६ खेळाडूंना रेड कार्ड दाखवून बाहेर काढले.

दरम्यान, या भांडणाची सुरुवात रॉड्रिगो प्राडोने केली होती. झेनिटसाठी ५५ नंबरच्या जर्सीमध्ये खेळणाऱ्या प्राडोने वादात उडी घेत हाणामारीला सुरूवात केली. पण रेफ्रीने त्याला रेड कार्ड दाखवले नाही. त्याचवेळी सामन्यावरील रेफ्रींचे नियंत्रण पूर्णपणे संपले. दोन्ही संघांचे बदली खेळाडू आणि प्रशिक्षकदेखील या हाणामारीचा भाग बनले. विशेष बाब म्हणजे ज्या सहा खेळाडूंना रेड कार्ड मिळाले ते प्लेइंग ११ चा भाग नव्हते. दोन्ही संघातील प्रत्येकी ३ खेळाडूंना रेड कार्ड दाखवण्यात आले.