Kolhapur: आदल्या दिवशी वाढदिवसाचे सेलिब्रेशन, दुसऱ्या दिवशी तरुणाचा मृत्यू, कोल्हापुरातील घटना
Kolhapur Rains: कोल्हापुरातील भटगाव पुलाजवळ अंगावर झाड पडल्याने तरुणाचा मृत्यू झाला आहे.
Kolhapur News: कोल्हापूरात सोमवारी मध्यरात्री वादळी पाऊस झाला. या पावसामुळे जिल्ह्यात अनेक ठिकाणी झाडांची पडझड झाली. नागरिकांनाही अनेक अडचणींना सामोरे जावा लागले. याच दरम्यान, भटगाव पुलाजवळ बाभळीचे झाड अंगावर पडल्याने एका तरुणाचा मृत्यू झाला. या तरुणाने आदल्या दिवशी त्याचा २६वा वाढदिवस साजरा केला. मात्र, वाढदिवसाच्या दुसऱ्याच दिवशी त्याच्यावर काळाने घाला घातला. या घटनेने परिसरात एकच खळबळ माजली आहे.
मिळालेल्या माहितीनुसार, आकाश धनावडे असे अंगावर झाड पडल्याने मृत्यू झालेल्या तरुणाचे नाव आहे. आकाशने आदल्या दिवशी त्याचा २६वा वाढदिवस साजरा केला. त्यानंतर दुसऱ्या दिवशी तो कामानिमित्त बाहेर गेला होता. काम आटोपल्यानंतर आकाश घराच्या दिशेने निघाला. परंतु, घरापासून अवघे ५०० मीटर दूर असताना आकाशच्या दुचाकीवर बाभळीचे झाड कोसळले. या घटनेत आकाश गंभीर जखमी झाला. त्याला रुग्णालयात घेऊन गेले असता डॉक्टरांनी त्याला मृत घोषित केले. घरातील तरुण मुलाचा दुर्दैवी मृत्यू झाल्याने धनावडे कुटुंबियांवर दु:खाचे डोंगर कोसळले. आकाशच्या पश्चात आई-वडील आणि बहीण असा परिवार आहे.
विजांच्या कडकडाटासह वादळी वाऱ्यासह झालेल्या जोरदार पावसाने कोल्हापूर जिल्ह्याला सोमवारी रात्री आणि मंगळवारी सकाळी अक्षरशः झोडपून काढले. या वादळी पावसामुळे कोल्हापूर शहरातील काही भागातील वीज पुरवठा देखील अर्ध्या तासासाठी खंडित झाला होता. मंगळवारी सकाळीदेखील अनेक भागात ढगाळ वातावरण होते. भारतीय हवामान विभागाकडून विजांच्या कडकडाटासह मध्यम स्वरूपाचा पाऊस पडेल, असा अंदाज वर्तवण्यात आला होता.
