The kerala Story: 'द केरळ स्टोरी' ओटीटी प्रदर्शनाबाबत निर्मात्यांचे मोठे वक्तव्य, म्हणाले...

द केरळ स्टोरी हा चित्रपट प्रदर्शित झाल्यापासून चर्चेत आहे. या चित्रपटावर काही ठिकाणी बंदी घालण्याची मागणी करण्यात आली आहे तर काही ठिकाणी हा चित्रपट टॅक्स फ्री करण्यात आला आहे. राजकीय वर्तुळातील अनेकांनी या चित्रपटावर टीका केली. मात्र, या चित्रपटाने बॉक्स ऑफिसवर तुफान कमाई केली. आता हा चित्रपट ओटीटीवर प्रदर्शित होणार असल्याचे म्हटले जात आहे. दरम्यान, त्यावर निर्मात्यांनी आता प्रतिक्रिया दिली आहे.

गेल्या काही दिवसांपासून द केरळ स्टोरी चित्रपट ओटीटीवर प्रदर्शित होणार असल्याच्या चर्चा रंगल्या आहेत. याबाबत निर्मात्यांना विचारताच ते म्हणाले की, 'आता पर्यंत आम्ही चित्रपटाचे डिजिटल हक्क विकलेले नाहीत. पण चित्रपटाचे हक्क खरेदी करण्यासाठी अनेक दिग्गज कंपन्या आमच्याकडे येत आहेत. मात्र, आम्ही कोणाचीही ऑफर स्वीकारलेली नाही.'

यापूर्वी जून महिन्यात 'द केरळ स्टोरी' हा चित्रपट झी५ या ओटीटीवर प्रदर्शित होणार असल्याच्या चर्चा रंगल्या होत्या. मात्र, आता या सर्व अफवा असल्याचे स्पष्ट झाले आहे. अद्याप चित्रपटाचे हक्क विकले गेलेले नाही हे समोर आले आहे.

‘द केरळ स्टोरी’चे दिग्दर्शन सुदीप्तो सेन यांनी केले आहे. या चित्रपटाची निर्मिती विपुल अमृतलाल शाह यांनी केली आहे. यात अभिनेत्री अदा शर्मा हिच्यासोबत योगिता बिहानी, सिद्धी इदनानी आणि सोनिया बालानी यांसारख्या कलाकारांनीही महत्त्वपूर्ण भूमिका केल्या आहेत. या चित्रपटाने जवळपास २३१ कोटी रुपयांची कमाई बॉक्स ऑफिसवर केली आहे. तर जगभरात चित्रपटाने २८४ कोटी रुपये कमावले आहेत.