Team India: वर्ल्डकपआधी BCCI अ‍ॅक्शन मोडवर, भारतीय संघात झाले ‘हे’ मोठे बदल

बीसीसीआयने हृषिकेश कानिटकर याची भारतीय महिला क्रिकेट संघाच्या फलंदाजी प्रशिक्षकपदी नियुक्ती केली आहे. ऑस्ट्रेलियाविरुद्धच्या टी-20 मालिकेपूर्वी तो संघात सामील होईल. ही मालिका ९ डिसेंबरपासून मुंबईत सुरू होत आहे. यासोबतच भारतीय महिला संघाचा माजी प्रशिक्षक रमेश पोवार याला राष्ट्रीय क्रिकेट अकादमीत (NCA) पाठवण्यात आले आहे. पोवार येथे व्हीव्हीएस लक्ष्मणच्या नेतृत्वाखाली काम करेल. महिला संघासोबत दीर्घकाळ काम केलेला पोवार आता पुरुष खेळाडूंसोबत काम करणार आहे.

वर्ल्डकप डोळ्यासमोर ठेवून कानिटकरची नियुक्ती

तसं पाहिलं तर, आगामी महिला टी-२० विश्वचषक डोळ्यासमोर ठेवून बीसीसीआयने हृषिकेश कानिटकरला भारतीय संघाचा फलंदाजी प्रशिक्षक बनवले आहे. महिला T20 विश्वचषक २०२३ हा दक्षिण आफ्रिकेत १० ते २६ फेब्रुवारी दरम्यान आयोजित केला जाणार आहे. हृषीकेश कानिटकर याला प्रशिक्षणासोबतच आंतरराष्ट्रीय क्रिकेटचा अनुभव आहे.

कोचपदी नियुक्ती झाल्यानंतर हृषिकेश कानिटकर काय म्हणाला?

नवीन जबाबदारी सोपवण्यात आल्यावर हृषिकेश कानिटकर म्हणाला, “वरिष्ठ महिला संघाचा नवा फलंदाजी प्रशिक्षक म्हणून नियुक्ती होणे हा सन्मान आहे. मला या संघात प्रचंड क्षमता दिसते आणि आमच्याकडे युवा खेळाडू आणि अनुभव यांचा चांगला मिलाफ आहे. मला विश्वास आहे की हा संघ पुढील आव्हानासाठी सज्ज आहे. आमच्याकडे काही मोठ्या स्पर्धा येत आहेत. त्या संघासाठी आणि फलंदाजी प्रशिक्षक म्हणून माझ्यासाठी रोमांचक असतील."

NCA मध्ये नवी जबाबदारी मिळाल्यानंतर रमेश पोवार काय म्हणाला?

तसेच, MCA मध्ये नियुक्ती झाल्यानंतर रमेश पोवार म्हणाला की, “वरिष्ठ महिला संघाचा मुख्य प्रशिक्षक म्हणून माझा कार्यकाळ खूप चांगला राहिला. गेल्या काही वर्षांत, मी खेळातील काही दिग्गज आणि देशातील नवोदित प्रतिभांसोबत जवळून काम केले आहे. NCA मध्ये मी भविष्यासाठी नवीन टॅलेंट तयार करण्यात मदत करणार आहे. खेळ आणि बेंच स्ट्रेंथ विकसित करण्यासाठी मी व्हीव्हीएस लक्ष्मणसोबत जवळून काम करण्यास उत्सुक आहे.”