Rakhi Sawant Arrest: राखी सावंतची सुटका! प्रतिक्रिया देत म्हणाली...

बॉलिवूडची ड्रामा क्वीन राखी सावंत १९ जानेवारी रोजी पोलिसांनी अटक केली होती. मॉडेल व अभिनेत्री शर्लिन चोप्राचे आक्षेपार्ह व्हिडीओ आणि फोटो व्हायरल केल्याप्रकरणी तिला अंबोली पोलिसांनी अटक केली होती. त्यानंतर तिची कसून चौकशी करण्यात आली. दिवसभर चौकशी झाल्यानंतर राखीची सुटका झाली. पोलीस स्टेशनबाहेर येताच राखीने माध्यमांशी संवाद साधला आहे.

बॉलिवूड सेलिब्रिटी फोटोग्राफर विरल भय्यानीने त्याच्या अधिकृत इन्स्टाग्राम अकाऊंटवर राखीचा व्हिडीओ शेअर केला आहे. या व्हिडीओमध्ये राखी तिची बाजू मांडताना दिसत आहे. “जय महाराष्ट्र, जय भारत, मी फक्त माझ्या आईला भेटायला रुग्णालयात आले आहे. मला डॉक्टरांचा फोन आला की माझ्या आईची प्रकृती गंभीर झाली आहे, तिची प्रकृती ठिक नाही. मला चक्कर येत आहे, माझा बीपी लो झालाय, मी दिवसभर जेवणही केलेलं नाही,” असे राखी म्हणाली.
वाचा: रियाज सोबतच्या 'त्या' व्हिडीओमुळे अमृता फडणवीस अडचणीत, काय आहे प्रकरण?

काही दिवसांपूर्वी राखीने एका महिला मॉडेलचा आक्षेपार्ह व्हिडीओ आणि फोटो व्हायरल केल्याचा आरोप करण्यात आला आहे. या प्रकरणी त्या मॉडेलने आंबोली पोलीस ठाण्यात तक्रार दाखल केली असून पोलिसांनी राखीला अटक केली आहे. मॉडेलने तक्रार दाखल केल्यानंतर माहिती तंत्रज्ञान कायद्यांतर्गत, नोव्हेंबर २०२२मध्ये राखी विरोधात गुन्हा दाखल करण्यात आला होता. अनेकदा राखीला चौकशीसाठी बोलावण्यात आले होते. राखी सावंतने यासंदर्भात अटकपूर्व जामिनासाठी मुंबई सत्र न्यायालयात अर्ज केला होता. मात्र, तो अर्ज न्यायालयानं फेटाळून लावला होता. शेवटी काल राखीला अटक करण्यात आली होती.