आगामी विधानसभा निवडणुकांच्या निकालाचा २०२४ च्या लोकसभा निवडणुकीवर परिणाण होण्याची दाट शक्यता आहे. किंबहुना आगामी विधानसभा निवडणुकीकडं ही लोकसभेची सेमीफायनल म्हणून पाहिलं जात आहे. मध्य प्रदेश या मोठ्या राज्यातील सत्ता टिकवण्यात भाजप यशस्वी होतो का, यावर बरंच काही अवलंबून आहे.

राजस्थानमध्ये सध्या अशोक गेहलोत यांच्या नेतृत्वाखाली काँग्रेसचं सरकार आहे.

राजस्थानमध्ये अशोक गेहलोत यांच्यासारखा कसलेला राजकारणी काँग्रेसचं नेतृत्व करतो आहे. मात्र, तरुण नेते सचिन पायलट यांच्याशी असलेल्या वादामुळं राज्य काँग्रेसमध्ये सध्या दोन गट आहेत. हे गट एकदिलानं काम करतात का त्यावर निकाल अवलंबून असेल. काँग्रेसमध्ये दुफळी असली तरी भाजपमध्येही सारं काही आलबेल नाही. काँग्रेसला टक्कर देऊ शकेल असा नेता भाजपकडं नाही. भाजपची भिस्त वसुंधरा राजे यांच्यावरच आहे.

छत्तीसगडमध्ये काँग्रेसची सत्ता आहे. भूपेश बघेल हे मुख्यमंत्री म्हणून काम पाहत आहेत.

राज्य स्थापनेनंतर छत्तीसगडमध्ये सलग १५ वर्षे भाजपची सत्ता होती. काँग्रेसची सत्ता केवळ मागील पाच वर्षे आहे. भूपेश बघेल यांच्याबद्दल सध्या तरी तिथं मोठी नाराजी नसल्याचं चित्र आहे. भाजप तिथं कोणता चेहरा देतो आणि काय रणनीती आखतो यावर निकालाची गणिते ठरतील.

मध्य प्रदेशात भाजपचा मोठा प्रभाव आहे. हिंदुत्वाचं राजकारण इथं मोठ्या प्रमाणात चालतं. मात्र, काँग्रेसला देखील या राज्यात मोठा जनाधार आहे. कमलनाथ यांची मधील काही वर्षे वगळता गेली अनेक वर्षे मध्य प्रदेशात भाजपचे शिवराज सिंह चौहान यांचं सरकार आहे. त्यामुळं भाजपला सत्ताविरोधी लाटेचा फटका बसू शकतो. मागील वेळी देखील काँग्रेस हाच सर्वात मोठा पक्ष होता. त्यामुळं भाजपला ही निवडणूक कठीण जाणार असल्याचं बोललं जात आहे.

मध्य प्रदेशात शिवराज सिंह चौहान यांच्या विरोधात अंतर्गत नाराजी असल्याचं समजतं. भाजपच्या ज्येष्ठ नेत्या उमा भारती नाराज आहेत. नुकताच तिथं आरएसएसच्या माजी प्रचारकांनी नवा पक्ष स्थापन केला आहे. या सगळ्याचा फटका भाजपला बसू शकतो.

तेलंगण राज्याची निर्मिती झाल्यापासून के. चंद्रशेखर राव इथल्या राजकारणावर पकड ठेवून आहेत. आगामी निवडणुकीत त्यांच्या वर्चस्वाला आव्हान देईल असा नेता तेलंगणमध्ये दिसत नाही. त्यामुळं ते सत्ता राखतील असंच चित्र आहे.

काँग्रेस नेते राहुल गांधी यांनी काढलेली कन्याकुमारी ते काश्मीर ही भारत जोडो यात्रा मध्य प्रदेश, राजस्थान, छत्तीसगड, तेलंगण या चारही राज्यांतून गेली होती. या यात्रेमुळं काँग्रेसबद्दल एक सकारात्मक जनमत तयार झालं आहे. त्याचा काही प्रमाणात फायदा काँग्रेसला होऊ शकतो, असं जाणकारांचं मत आहे.