Pune Crime: संतापजनक ! गैरवर्तनाला विरोध केल्याने मुलीच्या अंगावर ओतले मिरचीचे पाणी

पुणे : पुण्यात पिंपरी येथे एक धक्कादायक घटना उघडकीस आली आहे. एका मुलीची काही तरुण छेड काढत होते. तिच्याशी ते गैरवर्तन करत होते. याला त्या तरुणीने विरोध केल्याने आरोपी नराधमांनी मिरचीचे पाणी ओतले. तसेच त्या तरुणीचा विनयभंगही केला आहे.

पोलिसांनी दिलेल्या माहितीनुसार या प्रकरणी दोन तरूणांवर गुन्हा दाखल करण्यात आला आहे. चिखली गावठाणात ही घटना शनिवारी (दि २९) दुपारी १२.३० च्या सुमारास घडली. कृष्णा भाऊ मोरे (वय २७, रा. जाधववाडी, चिखली), कुणाल भंडारी यांच्यावर गुन्हा दाखल करण्यात आला आहे. याप्रकरणी एका तरुणीने तक्रार दिली आहे.

या घटनेची सविस्तर हकीकत अशी की, आयरोपी आणि पीडित तरुणीची जुजबी ओळख आहे. शनिवारी दुपारी ही तरुणी कामानिमित बाहेर जात होती. यावेळी आरोपींनी तिचा पाठलाग केला. काही अंतरावर तिचा हात पकडत आरोपी तिच्याशी लगट करू लागले. याला या तरुणीने विरोध केला असता तू आम्हाला आवडतेस, असे आरोपी कृष्णा मोरे म्हणाला. त्यानंतर कुणाल भंडारी याने तरुणीला जवळ ओढत तिचा विनय भंग केला. या सर्व प्रकाराला तरुणीने तीव्र प्रतिकार केला. यावेळी आरोपींनी तिच्या अंगावर मिरचीचे पाणी ओतले. तू आमच्या विरोधात तक्रार केली तर तुला सोडणार नाही, अशी धमकीही दिली. तरुणीच्या मनास लज्जा उत्पन्न होईल, असे कृत्य करून विनयभंग केला. तरुणी पोलिसात गेल्यावर तिच्या तक्रारीवर तातडीने कारवाई करत आरोपींना अटक करण्यात आली.