NCP : हसन मुश्रीफ यांच्यावर ईडीचे छापे; राष्ट्रवादीनं जोडला मोहन भागवतांच्या विधानाशी संबंध

NCP on ED raids on Hasan Mushrif : माजी मंत्री व राष्ट्रवादी काँग्रेसचे ज्येष्ठ नेते हसन मुश्रीफ यांच्या पुणे, कोल्हापूर येथील घरी व कारखान्यांवर सक्तवसुली संचालनालयानं (ED) छापे टाकले आहेत. त्यामुळं राज्यातील राजकारण पुन्हा एकदा ढवळून निघालं आहे. हसन मुश्रीफ यांनी या कारवाईवर आश्चर्य व्यक्त केलं असताना, आता राष्ट्रवादी काँग्रेसनं या कारवाईचा संबंध राष्ट्रीय स्वयंसेवक संघाचे सरसंघचालक मोहन भागवत (RSS Chief Mohan Bhagwat) यांच्या वक्तव्याशी जोडत ईडीच्या कारवाईचा निषेध केला आहे.

संघाचे मुखपत्र 'पांचजन्य'ला दिलेल्या एका मुलाखतीत मोहन भागवत यांनी अलीकडंच मुस्लिम समुदायाला उद्देशून अनेक मुद्दे मांडले आहेत. 'हिंदू आणि मुस्लिम वेगवेगळे असून दोन्ही एकत्र राहू शकत नाहीत, हा विचार मुस्लिमांना सोडावा लागेल. भारताला हिंदुस्तानच म्हटलं गेलं पाहिजे आणि या देशात मुस्लिमांना घाबरण्याचं कोणतंही कारण नाही, असं भागवत यांनी म्हटलं आहे. याच वक्तव्याचा उल्लेख करत राष्ट्रवादीनं मुश्रीफ यांच्यावरील कारवाईवर भूमिका मांडली आहे.

Hasan Mushrif : आधी नवाब मलिक, आता मी, नंतर अस्लम शेख असं… ईडी कारवाईवर हसन मुश्रीफ यांना 'हा' संशय

'भारतातील मुस्लिमांना घाबरण्याचं कारण नाही असं मोहन भागवत म्हणतात आणि त्यानंतर अवघ्या २४ तासांतच हसन मुश्रीफ यांच्या घरावर कारवाई होते, हे आश्चर्यकारक आहे, असं राष्ट्रवादीचे प्रवक्ते महेश तपासे यांनी म्हटलं आहे. 'भाजप सातत्यानं केंद्र सरकारी यंत्रणांचा वापर करत आहे. महाविकास आघाडी कमकुवत करण्यासाठी आणि नेत्यांना भाजपकडं खेचण्यासाठी हे सगळं सुरू आहे. भाजपचे काही नेते ईडीच्या संभाव्य छाप्यांबाबत माध्यमातून वक्तव्य करतात आणि पुढं तसंच घडतं याचा अर्थ काय?, असा सवाल महेश तपासे यांनी केला. शिंदे-फडणवीस सरकारच्या पाठीशी असलेल्या आमदार व खासदारांवरील सर्व आरोपांचं काय झालं? भाजपनं या नेत्यांवर भ्रष्टाचाराचे आरोप केले होते. ईडी, आयटीनं तपास बंद करून त्यांना निर्दोष सोडलं आहे का?, असा सवालही तपासे यांनी केला.

Ajit Pawar : सोम्या-गोम्यांचे प्रश्न मला विचारू नका; अजित पवारांनी सुनावले!