Thane sex Racket : मॉल परिसरात सेक्स रॅकेट चालविणाऱ्या महिलेस अटक, दोन अभिनेत्रींची सुटका

Thane sex Racket news : ठाण्यात सेक्स रॅकेट चालवणाऱ्या टोळीचा पर्दाफाश करण्यात आला असून एका महिलेला अटक करण्यात आली आहे. शहरातील घोडबंदर रस्त्यावरील एका मॉलपरिसरात शरीरविक्रय व्यवसाय चालविणाऱ्या दलाल महिलेस ठाणे गुन्हे अन्वेषण शाखेच्या अनैतिक मानवी तस्करी प्रतिबंध विभागाच्या पथकाने गुरुवारी सायंकाळच्या सुमारास अटक केली. या रॅकेटमधून हिंदी मालिका तसेच वेबसिरीजमध्ये काम करणाऱ्या दोन अभिनेत्रींची पोलिसांनी सुटका केली आहे.

मिळालेल्या माहितीनुसार सिने वंडर मॉलच्या तळ मजल्यावरील एका रेस्टॉरंटमध्ये एक महिला काही तरुणींना शरीर विक्रय व्यवसायासाठी आणणार असल्याची माहिती पोलिसांना मिळाली होती. त्यानंतर सापळा रचून पोलिस पथकाने २९ डिसेंबर रोजी सायंकाळच्या सुमारास बनावट गिऱ्हाईक पाठवून या रॅकेटचा पर्दाफाश केला. एका महिलेला अटक करून तिच्या तावडीतून मराठी, हिंदी वेब सिरीज, मालिका तसेच संगीत अल्बममध्ये काम करणाऱ्या दोन तरुणींची सुटका केली. या दलाल महिलेविरुद्ध चितळसर पोलिस ठाण्यात पिटा कायद्याअंतर्गत गुन्हा दाखल करण्यात आला आहे. तर सुटका करण्यात आलेल्या दोन तरुणींना मानपाडा, ठाणे येथील सुरक्षागृहात ठेवले आहे.