Gautam Adani : गौतम अदानींनी घेतली शरद पवारांची भेट; ‘सिल्वर ओक’वर एक तास चर्चा, चर्चांना उधाण

मुंबईतून एक मोठी बातमी समोर आली आहे. काँगेस आणि ठाकरे गट धारावी प्रकल्पावरून अदानींच्याविरोधात आक्रमक भूमिका घेत असताना आज अदानी (Gautam adani) यांनी शरद पवार यांच्या निवासस्थानी जाऊन त्यांची भेट घेतली. उद्योगपती गौतम अदानी यांनी राष्ट्रवादीचे सर्वेसर्वा शरद पवार (Sharad Pawar) यांची पवारांचे मुंबईतील निवासस्थान सिल्वर ओकवर भेट घेतली.अदानी आणि पवार यांच्यात अर्धा ते पाऊण तास चर्चा झाल्याची माहिती सूत्रांनी दिसी आहे. यावेळी शरद पवार गटाच्या खासदार सुप्रिया सुळे सुद्धा उपस्थित होत्या.

धारावी पुनर्विकास प्रकल्पाला विरोध करत उद्धव ठाकरे यांच्या नेतृत्वात महाविकास आघाडीने नुकताच मुंबईत भव्य मोर्चा काढला होता.  

शरद पवार यांच्या सिल्वर ओक या निवासस्थानी अदानी गुरूवारी रात्री पावणे नऊ वाजता पोहोचले आणि या दोघांमध्ये जवळपास तासभर चर्चा झाल्याची माहिती समोर येत आहे.

उद्धव ठाकरे गटाकडून धारावी बचाव आंदोलन करत अदानींना विरोध केला जात सताना अदानी आणि शरद पवार यांच्या भेटीने राजकीय वर्तुळात चर्चांना उधाण आले आहे.

धारावी झोपडपट्टीच्या पुनर्विकासाचे काम अदानी ग्रुपला दिल्याच्या विरोधात ठाकरे गटाचे पक्षप्रमुख उद्धव ठाकरे यांनी अदानींच्या कार्यालयावर भव्य मोर्चा काढला होता. या मोर्च्यात काँग्रेस आणि शरद पवार गटाचे कार्यकर्तेही सामील झाले होते. त्यावेळी उद्धव ठाकरे यांनी मागणी केली होती की, सरकारने धारावीचा विकास प्रकल्प अदानींना न देता स्वत: करावा.