Bharat Jodo Nyaya Yatra: भारत जोडो न्याय यात्रेचा मुंबईत समारोप, चैत्यभूमीवर राहुल गांधींनी वाचली संविधानाची प्रस्तावना!

Bharat Jodo Nyaya Yatra: काँग्रेस नेता राहुल गांधी (Rahul Gandhi) यांनी आज (शनिवार, १६ मार्च २०२४) मुंबईतील (Mumbai) चैत्यभूमीवर भारतीय संविधानाच्या प्रस्तावनेचे वाचन करून भारत जोडो न्याय यात्रेचा समारोप केला. तसेच त्यांनी चैत्यभूमीवर डॉ. बाबासाहेब आंबेडकर यांना आदरांजली वाहिली. यावेळी काँग्रस पक्षाची सरचिटणीस प्रियांका गांधी वाड्रा देखील उपस्थित होत्या. यापूर्वी त्यांनी धारावीतील जनतेला संबोधित करताना महिलांना अश्वासन दिले. काँग्रेस पुन्हा सत्तेत आल्यानंतर महिलांच्या खात्यात दरवर्षी १ लाख रुपये येतील, असे त्यांनी म्हटले.

मुंबईत भारत जोडो यात्रेचा समारोप करताना राहुल गांधी म्हणाले की, "काँग्रेसच्या गेल्या यात्रेत आम्ही 'द्वेषाच्या बाजारात प्रेमाचे दुकान' उघडले होते. लोकांनी मला सांगितले की बराच चाललो. पण मी बऱ्याच ठिकाणी गेलो नाही, ज्यात ओडिसा, झारखंड, छत्तीसगड, बंगाल, आसाम, बिहार यांचा समावेश होता. मला वाटले की, आणखी एक यात्रा काढली पाहिजे. त्यानंतर आम्ही आमची दुसरी यात्रा मणिपूरपासून सुरू केली आणि मुंबईत संपवली. मात्र, हा प्रवास मुंबईत संपलेला नाही. एवढ्यावरच शेवट नाही तर न्यायाचा लढा सुरू झाला आहे."

अदानी समूहाला दिलेल्या झोपडपट्टी विस्ताराशी संबंधित पुनर्विकास प्रकल्पाचा संदर्भ देत राहुल गांधी म्हणाले की, धारावी तुमची आहे आणि तुमचीच राहिली पाहिजे. तुमच्या कौशल्याचा आदर केला पाहिजे आणि हे ठिकाण देशाचे उत्पादन केंद्र बनले पाहिजे."

Loksabha election: देशभरात लोकसभेचं राज्यनिहाय संपूर्ण वेळापत्रक वाचा

राहुल गांधी उद्या (रविवारी, १७ मार्च २०२४) शिवाजी पार्क येथील सभेला संबोधित करतील. या बैठकीत भारत आघाडीच्या घटक पक्षांचे नेते एकत्र येणार आहेत. या सभेतून काँग्रेस शक्तीप्रदर्शन करणार आहे. काँग्रेस अध्यक्ष मल्लिकार्जुन खर्गे, आरजेडीचे तेजस्वी यादव, जम्मू-काश्मीरमधील नॅशनल कॉन्फरन्सचे नेते फारुख अब्दुल्ला, शिवसेना उद्धव बाळासाहेब ठाकरे पक्षाचे प्रमुख आणि महाराष्ट्राचे माजी मुख्यमंत्री उद्धव ठाकरे आणि समाजवादी पक्षाचे अखिलेश यादव, तामिळनाडूचे मुख्यमंत्री एमके स्टॅलिन, राष्ट्रवादीचे अध्यक्ष शरद पवार, झारखंडचे मुख्यमंत्री चंपाई सोरेन, झारखंडचे माजी मुख्यमंत्री हेमंत सोरेन यांच्या पत्नी कल्पना सोरेन, दीपंकर भट्टाचार्य आणि इतर अनेक नेते या सभेत सहभागी होणार आहेत. आम आदमी पार्टीचे अरविंद केजरीवाल यांचे प्रतिनिधीही मुंबईच्या सभेत सहभागी होणार आहेत. तर, पश्चिम बंगालच्या मुख्यमंत्री ममता बॅनर्जी, सीपीआय (एम) सरचिटणीस सीताराम येचुरी, सीपीआयचे सरचिटणीस डी राजा हे राहुल गांधींच्या सभेत सहभागी होणार नाहीत.