संभाजीनगर असे नामांतर आता करू शकतो पण.., उद्धव ठाकरेंनी स्पष्ट केली भूमिका

औरंगाबाद –औरंगाबाद शहराचे नाव बदलून संभाजीनगर करण्याविषयी मुख्यमंत्री उद्धव ठाकरे यांनी आपली भूमिका स्पष्ट केली. उद्धव ठाकरे म्हणाले की, संभाजीनगर नामांतर कधी करणार? या शहराचे नुसते नामातंर करणार नाही तेव्हा जेव्हा छत्रपती संभाजी महाराज यांना अभिमान वाटेल असं शहर उभं करेन, असं वचन देतो. नाव बदलायला काय आता बदलेन. पण तुम्हाला रस्त्यावर खड्डे दिले, नामांतर केलं, पाणी नाही दिलं, नाव बदलले आणि रोजगार नाही दिले तर कसं चालेल. संभाजीराजे सुद्धा मला रायगडावर टकमक टोक दाखवतील' असं शिवसेनेचे पक्षप्रमुख आणि मुख्यमंत्री उद्धव ठाकरे म्हणाले.

औरंगाबादमध्ये शिवसेनेचे पक्षप्रमुख उद्धव ठाकरे यांची सभा झाली. या सभेत उद्धव ठाकरे यांनी भाजपवर जोरदार टीकास्त्र सोडले आणि संभाजीनगरच्या नामांतरावर स्पष्ट बोलले.

उद्धव ठाकरे म्हणाले की, संभाजीनगर कधी करणार? संभाजीनगरचा ठराव हा दीड वर्षांपूर्वी मंजूर केला आहे. विमानतळाचे नाव संभाजीनगर करा असं सांगितलं आहे. केंद्राकडे प्रस्ताव दिला आहे. पण त्यावर कोणताही निर्णय झाला नाही. तुमच्याकडे काही दिलं तर झाकून ठेवायचं आणि आम्ही काही केलं नाही तर बोंबलत सुटायचं हा आक्रोश होऊ शकत नाही. जर तुमच्यात प्रामाणिकपणा असेल तर जाऊन केंद्राकडे बोला. या शहराचे नुसते नामातंर करणार नाही, तर छत्रपती संभाजी महाराज यांना अभिमान वाटेल असं शहर उभं करेन, असं वचन देतो.

केंद्राकडे जो प्रस्ताव दिला आहे,तिथे जाऊन आक्रोश करा,आमच्या राज्य सरकारने प्रस्ताव मांडला आहे,तो मंजूर करा. तर आम्ही तुमचा सत्कार करू, असंही उद्धव ठाकरे यांनी भाजपला सुनावले,

मध्ये कुणीतरी आक्रोश मोर्चा काढला होता. तो आक्रोश संभाजीनगरच्या पाण्यासाठी नव्हता तर सत्ता गेली त्याच्यासाठी होता. पाण्यासाठी तो आक्रोश असता तर आमच्या आधी पाच वर्ष तुम्हीच होता. आम्ही तुमच्यासोबत होतो. का नाही केलं काम? खोटं बोलणं आमचं हिंदुत्व नाही. असे उद्धव ठाकरे म्हणाले.