Pune Crime : बाबो..! चोरट्याने चक्क PMP बसच नेली चोरून, पुण्यात खळबळ

Pune crime News : आजकाळ कशाची चोरी होईल काही सांगता येत नाही.पुण्यातून पी. एम. पी. बस चोरीला गेल्याचा धक्कादायक प्रकार समोर आला आहे. चोरट्यांनी सारसबाग परिसरातून पीएमपी बस पळवून नेली व मार्केट यार्ड परिसरात बस सोडून चोरटे पसार झाले. जाताना चोरट्यांनी बसमधील पाच हजाराची बॅटरी काढून नेल्याचे सांगितले जात आहे.

आषाढी वारी पालखी सोहळ्यामुळे बस पार्किंगसाठी जागा उपलब्ध नव्हती. यामुळे पीएमपी बस पूलगेट आगारात न लावता चालकाने सारसबाग परिसरात पार्क केली होती. मात्र बसमधील चावी काढून नेण्यास चालक विसरले. बसमध्ये चावी असल्याचे पाहून चोरट्याने चक्क बस पळवून नेली. मात्र यामुळे शहरात खळबळ माजली.

मार्केट यार्ड परिसरात बस सोडून चोरटा पसार झाला. या प्रकरणी स्वारगेट पोलीस ठाण्यात अज्ञाताविरुद्ध गुन्हा दाखल करण्यात आला आहे.

मिळालेल्या माहितीनुसार पीएमपीच्या स्वारगेट आगारातून धावणाऱ्या बसेस लष्कर भागातील पूलगेट स्थानकात तसेच स्वारगेट भागात लावण्यात येतात. मात्र पालखी सोहळ्यामुळे पूलगेट स्थानकात बस लावण्यास जागा उपलब्ध नसल्याने एका चालकाने रात्री बस सारसबाग परिसरातील सणस मैदान परिसरात लावली होती.

चालक बस सोडताना चावी काढण्यास विसरला होता. बसमध्ये चावी तशीच असल्याचे पाहून चोरट्याने मध्यरात्रीच्या सुमारास बस पळवून नेली. याबाबत पीएमपीच्या स्वारगेट आगारातील सुरक्षा अधिकारी सुरेश सोनवणे यांनी स्वारगेट पोलीस ठाण्यात फिर्याद दिली आहे.

दरम्यान, बस चोरीस गेल्याचे बुधवारी (१४ जून) लक्षात आल्यानंतर  बसचा शोध घेण्यात आला. तेव्हा बस मार्केट यार्ड आगाराजवळ लावण्यात आल्याचे आढळून आले.