Abu Dhabi T10 लीगमध्ये फिक्सिंग! रैना-पोलार्डसह दिग्गज खेळाडूंनी खेळली फायनल, तपास सुरू

क्रिकेटवर पुन्हा एकदा फिक्सिंगचे सावट पसरले आहे. अबू धाबी टी-१० लीगमध्ये फिक्सिंग झाल्याचे समोर आले आहे. आयसीसीच्या लाचलुचपत प्रतिबंधक युनिटने या प्रकरणी तपास सुरू केला आहे. २३ नोव्हेंबर ते ४ डिसेंबर दरम्यान टी-१० क्रिकेट लीग युएईमध्ये खेळवली होती.

ICC या स्पर्धेतील भ्रष्टाचाराच्या ६ प्रकरणांची चौकशी करत आहे. २ आठवडे चाललेल्या या स्पर्धेत एकूण ८ संघांचा समावेश होता आणि अंतिम सामन्यासह ३३ सामने खेळले गेले. फायनलमध्ये डेक्कन ग्लॅडिएटर्सने न्यूयॉर्क स्ट्रायकर्सचा ३७ धावांनी पराभव केला होता.

ग्लॅडिएटर्सच्या वतीने सुरेश रैना, आंद्रे रसेल, निकोलस पूरन तर न्यू यॉर्कच्या संघातून किरॉन पोलार्ड, रशीद खान आणि ओरियन मॉर्गन हे स्टार क्रिकेटर्स मैदानात उतरले होते.

यूके डेली मेलच्या एका रिपोर्टनुसार, आयसीसीच्या लाचलुचपत प्रतिबंधक युनिटला T10 टूर्नामेंटमधील भ्रष्टाचाराच्या डझनहून अधिक तक्रारी प्राप्त झाल्या होत्या. आयसीसीचा तपास सट्टेबाजीवर केंद्रित आहे. सुमारे १५० कोटी रुपयांचा हा सट्टा असल्याचा अंदाज आहे. विशेष म्हणजे, या लीगमधील सर्व ८ संघांचे स्पॉन्सर्स हे सट्टेबाजी कंपन्याच होत्या. रिपोर्टनुसार, संघांचे मालक हे गोलंदाजी आणि फलंदाजीचा क्रम आधीच ठरवत होते. तर अनेक फलंदाज असे फटके खेळून बाद झाले ज्याची कोणी कल्पनाही करू शकत नाही.

दरम्यानस आता, आयसीसी या लीगचीही चौकशी करत आहे कारण सामन्यांदरम्यान संघ आणि त्यांच्या मालकांभोवती संशयास्पद गतिविधी होत असल्याच्या बातम्या देखील आल्या होत्या. आयसीसी फ्रँचायझी मालकांच्या भूमिकेचीही चौकशी करत आहे. याआधीही क्रिकेटमध्ये सट्टेबाजीची अनेक प्रकरणे समोर आली आहेत.

आंतरराष्ट्रीय क्रिकेटमध्ये फिक्सिंगमुळे पाकिस्तानचा वेगवान गोलंदाज मोहम्मद अमीरसह अनेक क्रिकेटपटूंना तुरुंगात जावे लागले होते. आयसीसीनेही त्यांच्यावर बंदी घातली होती. एस श्रीशांतसह अनेक भारतीय क्रिकेटपटूही याच्या कचाट्यात आले आहेत.