Indian Railway : रेल्वेत ५ वर्षापर्यंतच्या मुलांना लागणार तिकीट? रेल्वे मंत्रालयाने दिले उत्तर

रेल्वे मंत्रालयाने बुधवारी एक निवेदन जारी करत रेल्वे प्रवासादरम्यान लहान मुलांसाठी वेगळे तिकिट बुक करणे सक्तीचे असल्याचा वृत्ताचे खंडन केले. मंत्रालयाने म्हटले की, नियमात असा कोणताही बदल करण्यात आलेला नाही. काही मीडिया रिपोर्ट्समध्ये दावा करण्यात आला होता की, एक ते चार वर्षे वयाच्या मुलांसाठी रेल्वे प्रवासादरम्यान वेगळे तिकिट काढावे लागले. मात्र मंत्रालयाने या वृत्तांचे खंडन करून या केवळ अफवा असल्याचे म्हटले आहे. 

रेल्वे  मंत्रालयाने म्हटले की, प्रवाशांना पाच वर्षाहून कमी वयाच्या मुलांचे वेगळे तिकीट तेव्हाच काढावे लागेल ज्यावेळी त्यांना स्वंतत्र बर्थ पाहिजे. रेल्वेने म्हटले की, जर त्यांना वेगळा बर्थ नको असेल तर पाच वर्षाहून कमी वयाच्या मुलांना मोफत प्रवास आहे. जसा यापूर्वी होता. 

६ मार्च, २०२० च्या  सर्कुलरनुसार रेल्वे मंत्रालयाने पुढे म्हटले की, पाच वर्षाहून कमी वयाच्या मुलांना मोफत प्रवास आहे. मंत्रालयाने म्हटले की, जर ५ वर्षाहून कमी वयाच्या मुलांसाठी बर्थ/सीटची मागणी केली गेल्यास सामान्य तिकीट दराप्रमाणे त्यांना वेगळी तिकीट खरेदी करावी लागेल. 

यापूर्वी समाजवादी पार्टीचे नेते अखिलेश यादव यांनी रेल्वेत पाच वर्षाहून कमी वयाच्या मुलांचे वेगळे तिकीट घेण्याच्या वृत्तावर प्रतिक्रिया व्यक्त केली होती. त्यांनी म्हटले होते की, रेल्वे आता गरीबांसाठी नाही. आता लोक भाजपचे संपूर्ण तिकीट कापतील.