Kerala High Court: पत्नीची अन्य महिलांशी तुलना करणं हा क्रूरपणा - हायकोर्ट

Kerala High Court Judgement On Husband Wife Dispute : वैवाहिक जीवनात पतीनं पत्नीची इतर महिलांशी तुलना करणं किंवा तिच्यावर रागावून ओरडणं ही क्रुरता असल्याचं केरळ हायकोर्टानं एका खटल्यात म्हटलं आहे. कौटुंबिक न्यायालयात दिलेल्या निकालानंतर त्याला हायकोर्टात आव्हान देणाऱ्या एका याचिकेवर सुनावणी करताना केरळ उच्च न्यायालयानं विवाहिक कलहांवर ही महत्त्वपूर्ण टिप्पणी केली आहे.

एका महिलेनं हायकोर्टात दाखल केलेल्या याचिकेवर सुनावणी करताना केरळ हायकोर्टाचे न्यायमूर्ती अनिल के नरेंद्रन आणि सीएस सुधा यांच्या खंडपीठानं वारंवार पत्नीवर ओरडणं आणि तिची दुसऱ्या महिलांशी तुलना करणं ही क्रुरता असल्याचं म्हटलं आहे, याशिवाय केवळ सुंदर न दिसणं हे घटस्फोटासाठी योग्य कारण नाही, त्यामुळं ज्या वैवाहिक संबंधामध्ये संबंध कायम ठेवण्याची अपेक्षा आहे, तिथं घटस्फोट घेतला जाऊ नये, असं म्हणत खटल्यात हस्तक्षेप करण्यास हायकोर्टानं नकार दिला आहे.

काय आहे प्रकरण?

केरळमध्ये एका पतीनं पत्नी इतर महिलांच्या तुलनेत सुंदर दिसत नसल्याचं कारण देत तिला घटस्फोट देण्याचा निर्णय घेतला होता. त्यानंतर हायकोर्टात या केसची सुनावणी झाली. पिडित पत्नीनं पती सुंदर दिसण्याची अपेक्षा पूर्ण नसल्याचं वारंवार सांगत असून तो छळ करत असल्याचं आरोप केला होता. त्यानंतर या खटल्यात सुनावणी करताना कोर्टानं वैवाहिक संबंधावर महत्त्वपूर्ण टिप्पणी केली आहे.

दरम्यान काही दिवसांपूर्वी केरळच्या हायकोर्टानं बलात्कार पिडितेला २४ महिन्यांच्या आत गर्भपात करण्याचा अधिकार असल्याचा निकाल दिला होता. याशिवाय एका खटल्यात महिलेच्या शरीरावर कुठल्याही हेतूनं पुरुषांनी स्पर्श केला असेल तर तो बलात्काराच्या गुन्हात येईल, असंही म्हटलं होतं.