Bengaluru Crime: जादा भाड्यावरून वाद पेटला, रिक्षाचालकाने दोन प्रवाशांना चाकूने भोसकले; एकाचा मृत्यू

Bengaluru Rickshaw Driver Allegedly Stabbed Passengers: बंगळुरूच्या यशवंतपूर रेल्वे स्थानकावर एक धक्कादायक घटना घडली. जादा भाड्यावरुन रिक्षाचालक आणि प्रवाशांमध्ये वाद पेटला. हा वाद विकोपाला गेल्याने संतापलेल्या रिक्षाचालकाने त्याच्या रिक्षात बसलेल्या दोन प्रवाशांवर चाकूने हल्ला केला. या हल्ल्यात एकाचा मृत्यू झाला. तर, दुसऱ्यावर जवळच्या रुग्णालयात उपचार सुरू असून त्याची प्रकृती चिंताजनक आहे. याप्रकरणी स्थानिक पोलिसांनी रिक्षाचालकाला अटक केली असून पुढील तपासाला सुरुवात झाली आहे.

मिळालेल्या माहितीनुसार, दोन प्रवासी एका रिक्षातून मॅजेस्टिकवरून यशवंतपूर रेल्वे स्थानकाकडे जाण्यासाठी निघाले. रेल्वे स्थानकावर पोहचल्यानंतर रिक्षाचालकाने ठरल्यापेक्षा जास्त पैसे मागितले. ज्यामुळे रिक्षाचालक आणि प्रवाशांमध्ये वाद सुरु झाला. हा वाद हाणामारीपर्यंत पोहचला. यावर संतापलेल्या रिक्षाचालकाने दोन्ही प्रवाशांना चाकूने भोसकले. या घटनेत दोन्ही प्रवाशी गंभीर जखमी झाले. त्यांना त्वरीत जवळच्या रुग्णालयात हलवण्यात आले. परंतु, डॉक्टरांनी यातील एकाला मृत घोषित केले. तर, दुसऱ्यावर आयसीयूमध्ये उपचार सुरु आहेत.

खळबळजनक.. ३ मुलांच्या बापाने मित्राच्या पत्नीला नेले पळवून, महिलेनेही प्रियकरासाठी ८ मुलांना वाऱ्यावर सोडले

पोलिसांनी दिलेल्या माहितीनुसार, या घटनेत जखमी झालेले तरुण भाऊ आहेत. अहमद असे मृत्यू झालेल्या तरुणाचे नाव आहे. तर, अयूब याच्यावर रुग्णालयात उपचार सुरु आहेत. याप्रकरणी आरोपी रिक्षाचालकाला अटक करण्यात आली असून पुढील तपास सुरु आहे. रिक्षाचालक हा गुन्हेगारी पार्श्वभूमीचा असून त्याच्याविरोधात विविध पोलीस ठाण्यात गुन्हे दाखल आहेत.