Yavatmal News : दिवाळीच्या सुट्टीत मामाच्या गावाला आलेल्यादोन मुलींचा तलावात बुडून मृत्यू

यवतमाळ जिल्ह्यातून एक दुर्दैवी घटना समोर आली आहे. मनदेव गावा येथील जेतवन पर्यटनस्थळी दोन चिमुकल्या मुलींचा परिसरातील तलावात बुडून मृत्यू झाला आहे. या मुली दिवाळीच्या सुट्टीनिमित्त मामाच्या गावाला आल्या होत्या. रिया किशोर बिहाडे आणि काव्या धम्मपाल भगत अशी मृत्यू झालेल्या मुलींची नावं आहेत. यातील काव्या भगत ही मामाच्या गावी आली होती. याचवेळी ही घटना घडली आहे. घटनेनं परिसरात हळहळ व्यक्त होत आहे.

मिळालेल्या माहितीनुसार, यवतमाळच्या मनदेव गावा येथील जेतवनमध्ये दुपारच्या सुमारासही घटना घडली. खेळत असताना तलावात बुडून दोन मुलींचा मृत्यू झाला. दिवाळीच्या सुटीत मामाच्या गावी आलेली काव्या भगत आपल्या कुटूंबासह जेतवनला भेट देण्यासाठी गेली होती.

जेतवन परिसरात खेळत असताना या मुली अचानक तलावात पडल्या. दोघी पाण्यात बुडू लागल्याचे लक्षात आल्यानंतर कुटुंबीयांनी तलावाकडे धाव घेतली. त्यांना तलावाच्या बाहेर काढण्यात आलं. त्यांना तत्काळ जवळच्या रुग्णालयात दाखल करण्यात आलं. मात्र तोपर्यंत उशीर झाला होता. या दोघींनाही मृत घोषित केलं.