Washim: लग्नाला कुटुंबियांचा विरोध! अनेक वर्षांच्या प्रेमाचा करुण अंत, परिसरात हळहळ

प्रेमाला घरच्यांचा होत असलेल्या विरोधास कंटाळून प्रेमीयुगुलाने आपले जीवन संपवल्याची हृदयद्रावक घटना वाशिम जिल्ह्यातील मालेगाव तालुक्यात घडली आहे. येथे प्रेमीयुगुलाने गळफास घेऊन आपली जीवनयात्रा संपवली. जऊळका पोलीस ठाण्यांतर्गत उमदरी वनपरिक्षेत्रात ही घटना घडली. पोलिसांनी घटनास्थळी धाव घेत प्रेमीयुगुलाचे मृतदेह खाली उतरवून शवविच्छेदनासाठी पाठवले. या घटनेनं परिसरात हळहळ व्यक्त केली जात आहे.

लक्ष्मी ठाकरे (वय २० वर्ष रा.कुत्तरडोह), महादेव लोखंडे (वय २३ वर्ष, रा कवरदरी) अशी मृत प्रेमीयुगुलाची नावे आहेत. 

पोलिसांनी दिलेल्या माहितीनुसार, लक्ष्मी आणि महादेव दोघेही वाशिममधील रहिवाशी असून त्यांचे मागील अनेक वर्षापासून एकमेकांवर प्रेम होते. मात्र, त्यांच्या प्रेमसंबंधाला दोघांच्या घरच्यांचा विरोध होता.

कुटूंबाच्या विरोधाला कंटाळून दोघांनी घरातून पळून जाण्याचा निर्णय घेतला. काही दिवसांपासून ते घरातून बेपत्ता होते. दोघेही पुण्याला पळून गेल्याची तक्रार त्यांच्या कुटूंबीयांकडून करण्यात आली होती. पोलीस दोघांचा शोध घेत असतानाच लक्ष्मी आणि महादेव यांचे मृतदेह बुधवारी पहाटेच्या सुमारास मालेगाव तालुक्यातील उमदरी वनपरिक्षेत्रातील जंगलात आढळून आले. दोघांनी गळफास घेतल्याचे आढळून आले.

या घटनेनं परिसरात मोठी खळबळ उडाली असून नागरिकांमधून हळहळ व्यक्त होत आहे.