Washim News : ११ वर्षे देशसेवा.. कर्तव्यावर असतानाच वाशिमच्या सुपुत्राला लेहमध्ये वीरमरण; जिल्ह्यावर शोककळा

भारतीय लष्करात सामील होऊन देशसेवा करणाऱ्या महाराष्ट्राच्या सुपुत्राला लडाखमधील लेहमध्ये वीरमरण आलं आहे. आकाश आढागळे (वय ३१) असं शहीद जवानाचं नाव असून तो गेल्या ११  वर्षापासून भारतीय लष्कराची सेवा बजावत होता. आकाशचे मूळ गाव वाशिम जिल्ह्यातील शिरपूर  आहे. त्याच्या मृत्युमुळे आढागळे कुटुंबावर दु:खाचा डोंगर कोसळला आहे.

लेहमध्ये कर्तव्यावर असताना ८ सप्टेंबर २०२३ रोजी एका अपघातात आकाशाला गंभीर दुखापत झाली होती. त्याच्यावर सैन्यदलाच्या रुग्णालयात त्यांच्यावर उपचार सुरु होते.

उपचारादरम्यान रविवारी (१० सप्टेंबर) त्यांची प्राणज्योत मालवली. आकाश यांच्या पश्चात पत्नी रुपाली आढागळे, ४ वर्षाची मुलगी तन्वी, आई व दोन भाऊ असा परिवार आहे.

शहीद आकाश यांचे मोठे भाऊ नितीन सीमा सुरक्षा दलात तर लहान भाऊ महाराष्ट्र पोलीस दलात कार्यरत आहेत. घरची परिस्थिती अत्यंत हलाकीची असताना कठोर परिश्रम घेत आकाश २०११ मध्ये इंडियन आर्मीत भरती झाले होते. 

११ वर्ष देशाची सेवा केल्यानंतर त्यांना वीरमरण आले. आकाश यांचं पार्थिव मंगळवारी (१२ सप्टेंबर) त्यांच्या मूळगावी शिरपूर येथे आणले जाणार आहे. तिथे त्यांच्यावर शासकीय इतमामात अंत्यसंस्कार करण्यात येणार आहेत.