Washim News : धक्कादायक! वाशिममध्ये शिक्षकाला मारहाण करून पेट्रोल ओतून पेटवलं; उपचारादरम्यान मृत्यू

वाशिम जिल्ह्यातील मालेगाव येथून एक धक्कादायक घटना समोर आली आहे.येथे प्राथमिक शाळेतील शिक्षकाला अज्ञात व्यक्तींनी पेट्रोल ओतून पेटवल्याची धक्कादायक घटना घडली आहे. गंभीररित्या भाजलेल्या शिक्षकाचा उपचारादरम्यान मृत्यू झाला आहे. वाशिमच्या मालेगाव तालुक्यातील मालेगाव-बोरगाव रस्त्यावरील कोल्ही शिवारात हा प्रकार घडला. या घटनेने परिसरात एकच खळबळ उडाली आहे.

दिलीप धोंडोजी सोनवणे असे मृत शिक्षकाचे नाव आहे. दिलीप धोंडोजी सोनवणे हे मालेगाव तालुक्यातील बोरगाव जिल्हा परिषद शाळेत शिक्षक म्हणून कार्यरत होते. कोल्ही शिवारात अज्ञात लोकांनी प्राथमिक शाळेच्या शिक्षकाला लोखंडी रॉडने डोक्यावर वार केले. त्यानंतर शिक्षकाच्या अंगावर पेट्रोल ओतून पेटवले. या हल्ल्यात दिलीप सोनवणे गंभीर जखमी झाले. उपचारादरम्यान त्यांचा मृत्यू झाला आहे. शिक्षकाच्या मृत्यूनंतर झेडपी शाळेच्या शिक्षकांच्या वर्तुळात खळबळ माजली आहे. 

आज (सोमवार) बोरगाव येथील जिल्हा परिषद शाळेत जात असताना शिक्षक दिलीप सोनवणे यांचा अज्ञात व्यक्तींनी रस्ता अडवला. मालेगाव-बोरगाव रोडवर कोल्ही शिवारात अज्ञात व्यक्तींनी दिलीप सोनवणे यांचा रस्ता अडवून त्यांच्या डोक्यावर रॉडने मारहाण केली. त्यानंतर अज्ञात हल्लेखोरांनी त्यांच्या अंगावर पेट्रोल ओतलं आणि पेटवून दिलं. त्यांना तत्काळ वाशिम येथील सामान्य रुग्णालयात दाखल केले. उपचारादरम्यान डॉक्टरांनी शिक्षक दिलीप सोनवणे यांना मृत घोषित केले.