Pune Crime : क्रिप्टो करन्सीचा लोभ पडला महागात; तरुणाला साडेनऊ लाखांचा चुना

Pune crime पुण्यात आॅनलाईन फ्रॉडच्या घटना दिवसेंदिवस वाढत चालल्या आहेत. थोड्या लोभापाई अनेक जण मोठी रक्कम गमावून बसत आहे. अशीच एक घटना पुण्यात उघडकीस आली असून क्रिप्टो करन्सी देण्याच्या बहाण्याने एका तरुणाची तब्बल साडेनऊ लाखांची फसवणूक केल्याचा प्रकार उघडकीस आला आहे. या प्रकरणी दोघांवर गुन्हा दाखल करण्यात आला आहे.

विक्रांत इश्वर गर्ग, नैना देवेंद्र जॉन असे फसवणूक केलेल्या बंटी बबलीचे नाव आहे. पोलिसांनी दिलेल्या माहितीनुसार या प्रकरणी अब्दूल वारी नझीर (वय ३२) या तरुणाने लष्कर पोलिस ठाण्यात तक्रार दिली आहे. या घटनेची हकीगत अशी की नैना देवेंद्र जॉन हिचा सलमान हा मित्र आहे. आरोपी नैना आणि विक्रांतने सलमानच्या औळखीचा गैरफायदा घेण्याचे ठरवले. त्याला दोघांनी मिळून बाजारभावापेक्षा स्वस्त दरात क्रिप्टो करन्सी (आभासी चलन) देतो असे सांगितले. या साठी दोघांनी सलमानकडून वेळोवेळी तब्बल ९ लाख ३९ हजार ९३८ रुपये बँकखात्यातून ट्रान्सफर करून घेतले.

काही दिवसानंतर सलमानने दोघांना क्रिप्टोकरन्सीची मागणी केली. मात्र, दोघांनीही उडवाउडवीची उत्तरे दिली. सलमान सातत्याने त्यांना फोन करू लागला. मात्र, त्यांनी त्यांच्या कुठल्यास फोनला उत्तर दिले नाही. यानंतर सलमानला आपली फसवणूक झाल्याचे लक्षात आले. त्याने ताबडतोब लष्कर पोलिस ठाणे गाठत फिर्याद दिली आहे. दरम्यान, आरोपी फरार आहेत. पोलिसांनी या प्रकरणी गुन्हा दाखल केला आहे. पोलिस उपनिरीक्षक पवार हे पुढील तपास करत आहेत.