Pune Traffic Change : पुण्याच्या मध्यभागात वाहतूक व्यवस्थेत बदल; अंगारक चतुर्थीनिमित्त प्रशासणाचा निर्णय

पुणे : नव्या वर्षातील पहिली अंगारकी चतुर्थी ही मंगळवारी (दि १०) येणार आहे. या दिवशी मध्य पुण्यात श्रीमंत दगडूशेठ हलवाई गणपतीच्या दर्शनासाठी होणारी गर्दी पाहता, खबरदारीचा उपाय म्हणून प्रशासनाने मध्य पुण्यातील वाहतूक व्यवस्थेत मंगळवारी बदल केला आहे. नागरिकांची संभाव्य गर्दी पाहता, शिवाजी रस्ता बंद ठेवण्यात येणार आहे. त्यामुळे वाहनचालकांनी पर्यायी मार्गाचा वापर करण्याचे आवाहन वाहतूक पोलिसांनी केले आहे.

अंगारक चतुर्थीनिमित्त शिवाजी रस्त्यावरील श्रीमंत दगडूशेठ हलवाई गणपती मंदिरात भाविकांची मोठी गर्दी होते. मंगळवारी येणारी चतुर्थी ही या वर्षातील पहिली असल्याने मोठ्या प्रमाणात भाविक येण्याची शक्यता आहे. त्यामुळे शिवाजी रस्ता मंगळवारी वाहतुकीस बंद ठेवण्यात येणार आहे. या मार्गावरील वाहतूक ही पर्यायी मार्गाने वळवली आहे. वाहनचालकांनी पर्यायी मार्गाचा वापर करावा, असे आवाहन वाहतूक शाखेचे पोलीस उपायुक्त विजयकुमार मगर यांनी केले आहे.

पूरम चौकातून बाजीराव रस्त्यावरुन शिवाजीनगरकडे जाणाऱ्या वाहनचालकांनी पूरम चौकातून टिळक रस्ता, अलका चित्रपटगृह चौकमार्गे डेक्कन जिमखान्याकडे जावे. फर्ग्युसन रस्त्याने इच्छितस्थळी जावे. शिवाजी रस्त्यावरुन स्वारगेटकडे जाणाऱ्या वाहनचालकांनी स. गो. बर्वे चौकातून (माॅडर्न कॅफे) जंगली महाराज रस्त्याने खंडुजीबाबा चौक, टिळक चौक मार्गे इच्छितस्थळी जावे. स. गो. बर्वे चौकातून महापालिका भवनकडे जाणाऱ्या वाहनचालकांनी जंगली महाराज रस्त्याने झाशी राणी चौकातून डावीकडे वळून इच्छितस्थळी जावे. अप्पा बळवंत चौकातून बुधवार चौकाकडे जाणाऱ्या वाहनचालकांनी बाजीराव रस्त्याने सरळ जाऊन इच्छितस्थळी जावे.