Vasant More: रुपेश, सावध रहा नाहीतर...; मनसे नेते वसंत मोरे यांच्या मुलाला धमकी

पुणे : मनसेचे नगरसेवक वसंत मोरे यांच्या मुलगा रुपेश मोरे जीवे मारण्याची धमकी एका अज्ञाताने दिल्याची धक्कादायक घटना शुक्रवारी उघडकीस आली आहे. एका अज्ञाताने रुपेशच्या पार्किंगमध्ये उभ्या असलेल्या मोटारीवर एक चिठ्ठी लिहून ठेवली. या चिठ्ठीत सावध रहा रुपेश अन्यथा असा मजकुर लिहिला आहे. या प्रकरणी भारती विद्यापीठात तक्रार दिली असून गुन्हा दाखल करण्यात आला आहे.

वसंत मोरे यांनी दोन दिवसांपूर्वी मनसे अध्यक्ष राज ठाकरे यांच्या वाढदिवसानिमित्त रोजगार मेळाव्याचे आयोजन केले होते. रुपेश हे वसंत मोरे यांच्या सोबत या रोजगार मेळाव्याला हजर होते. त्यांनी त्यांची कार थोरवे शाळेच्या वाहनतळात उभी केली होती. यावेळी एकाने त्यांच्या गाडीवर एक चिठ्ठी लिहून ठेवली. रुपेश हे परत गाडीवर आल्यावर त्यांना त्यांच्या गाडीवर एक कागद दिसला. त्यांनी तो वाचला असता त्यात, ‘सावध रहा रुपेश, अन्यथा असा धमकीवजा मजकुर लिहिलेला आढळला. हा प्रकार गंभीर असल्याने वसंत मोरे आणि रुपेश मोरे यांनी भारती विद्यापीठ पोलिसांत धाव घेत या प्रकरणी तक्रार दाखल केली आहे. पोलिसांनी गुन्हा दाखल केला असून अज्ञात व्यक्तीचा शोध घेतला जात आहे.

वसंत मोरे हे मनसेचे नगरसेवक आहे. राज ठाकरे यांनी घेतलेल्या भूमिकेमुळे ते नाराज आहे. यामुळे त्यांनी त्यांच्या शहराध्यक्ष पदाचा राजीनामा दिला होता. दरम्यान, त्यांची समजुत काढण्याचा प्रयत्न राज ठाकरे यांनी केला. दरम्यान त्यांना अनेक पक्षांनी आॅफर दिली आहे. यामुळे सातत्याने ते चर्चेत असतात. त्यांच्या मुलाला मिळालेल्या या धमकीपुळे पुण्यातील राजकारण पुन्हा ढवळून निघणार आहे.