Washim Accident : रस्त्यात थांबलेल्या ट्रकवर खासगी आरामबस आदळली, ४ प्रवासी जागीच ठार तर १२ जखमी

वाशिम जिल्ह्यात मालेगाव -मेहकर रस्त्यावर उभ्या ट्रकला खासगी बसने जोरदार धडक दिल्याने भीषण अपघात झाला आहे. या अपघातात चार प्रवाशांचा मृत्यू झाला असून १२ जण गंभीर जखमी झाले आहेत. हा अपघात वडप गावाजवळ सोमवारी रात्री १० वाजताच्या सुमारास झाला. 

मिळालेल्या माहितीनुसार खासगी बस ( पीवाय-०५ ई १९५८) मालेगावमार्गे पुण्याकडे जात होती. वडपनजिक चालकाचे नियंत्रण सुटल्याने बस रस्त्यावर उभ्या असलेल्या ट्रकवर (आरजे ४७, जीए १८५०) आदळली. ही धडक इतकी भीषण होती की, यात बसमधील चार प्रवासी ठार झाले, तर १२ जण गंभीर जखमी झाले. 

मंगेश शेषराव तिके (२५ वर्षे रा. वाघजाळी जि. वाशिम), अक्षय प्रभु चव्हाण (२३ वर्षे रा. साखरा जि. यवतमाळ), दिपक सुरेश शेवाळे (२७ वर्षे रा. गणेशपुर केनवड जि वाशिम) आणि अजय भारत शेलकर (२३ वर्षे रा. कडसा जि. यवतमाळ), अशी मृतांची नावे आहेत. 

अपघातानंतर काही मिनिटांत १०८ रुग्णवाहिका घटनास्थळी दाखल झाली आणि सर्व जखमींना तातडीने मालेगाव रुग्णालयात दाखल केले. तेथे प्राथमिक उपचारानंतर सर्व जखमींना वाशिम जिल्हा सामान्य रुग्णालयात हलवण्यात आले आहे.

अपघातानंतर बसचालक फरार झाला आहे. अपघात झाल्यानंतर परिसरातील नागरिकांना तात्काळ मदतकार्य सुरू केले. अपघातात बसच्या समोरील भागाचा चुराडा झाला असून ट्रकचेही मोठे नुकसान झाले आहे.