Rajapur Crime News : मुंबई-गोवा महामार्गावर टोलनाक्याची तोडफोड, पोलिसांकडून मनसैनिकांना अटक

Rajapur Crime News Marathi : मुंबई-गोवा महामार्गावरील राजापूर तालुक्यातल्या टोलनाक्यावर तोडफोड करण्यात आल्याची धक्कादायक घटना समोर आली आहे. गुरुवारी सायंकाळी हातिवले येथील टोलनाक्यावर ही घटना घडली आहे. या प्रकरणात पोलिसांनी दोन आरोपींना अटक केली असून अन्य फरार आरोपींचा शोध घेतला जात आहे. पोलिसांकडून अटक करण्यात आलेले दोन्ही आरोपी हे महाराष्ट्र नवनिर्माण सेनेचे कार्यकर्ते असल्याची प्राथमिक माहिती आहे. त्यानंतर आता पोलिसांकडून दोघांची चौकशी सुरू करण्यात आली आहे. आरोपींनी टोलनाक्यावरील केबिन आणि अन्य ठिकाणची मोडतोड केल्याची माहिती आहे.

मिळालेल्या माहितीनुसार, गुरुवारी संध्याकाळी मुंबई-गोवा महामार्गावरील राजापूर तालुक्यातल्या हातिवले येथील टोलनाक्यावर दाखल होत दहा ते पंधरा जणांच्या टोळक्याने चांगलाच धूडगूस घातला. आरोपींनी टोलनाक्यावरील केबीनची तोडफोड केली असून अन्य साहित्य आणि ऑफिस फोडले आहे. त्यानंतर या प्रकरणाची माहिती मिळताच स्थानिक पोलिसांनी तातडीने घटनास्थळी धाव घेतली. त्यानंतर पोलिसांनी दोन आरोपींना ताब्यात घेतलं असून त्यांची चौकशी सुरू करण्यात आली आहे. चौकशीअंती गुन्हा दाखल करण्याची प्रक्रिया सुरू करण्यात येणार असल्याचं पोलिसांकडून सांगण्यात आलं आहे. परंतु राजापुरमध्ये घडलेल्या या घटनेने मोठी खळबळ उडाली आहे.

Live News Updates 18 August 2023 : कौटुंबिक वादातून तरुणाला संपवलं, फरार आरोपींचा शोध सुरू

महाराष्ट्र नवननिर्माण सेनेचे अध्यक्ष राज ठाकरे यांनी पनवेलमधील मनसेच्या निर्धार मेळाव्यात मुंबई-गोवा महामार्गावरील खड्ड्यांचा प्रश्न उपस्थित केला होता. याशिवाय यावरून त्यांनी सत्ताधारी भाजप व शिंदे गटावर जोरदार हल्लाबोल केला होता. समृद्धी महामार्गावरील अपघातांच्या घटनांवरून राज ठाकरे यांनी उपमुख्यमंत्री देवेंद्र फडणवीस यांना लक्ष्य केलं होतं. परंतु आता पनवेलमधील मनसेचा निर्धार मेळावा संपताच आता राजापुरात टोलनाका फोडण्यात आल्याची धक्कादायक घटना समोर आली आहे. त्यामुळं आता आरोपी मनसेच्या कार्यकर्त्यांवर कठोर कायदेशीर कारवाई होण्याची शक्यता वर्तवण्यात येत आहे.

बैलाला वाचवण्यासाठी ७ लोक विहिरीत उतरले; त्याचवेळी मातीचा ढिगारा अंगावर कोसळल्याने पाच जणांचा मृत्यू