Mumbai Rain: मुंबईत पावसाचा कहर.. दोन ठिकाणी झाडे कोसळून दोन तरुणाचा मृत्यू

Mumbai rain update: मुंबईत गेल्या दोन दिवसांपासून पावसाने जोरदार हजेरी लावली आहे. मुंबई, उपनगरे व ठाण्यात पावसाने कहर केला असून रस्त्यांना तलावाचे रुप आले आहे. अनेक ठिकाणी पावसासोबत जोरदार वारे वाहत असल्याने झाडे उन्मळून पडल्याच्या व घरे कोसळण्याच्या घटनाही समोर आल्या आहेत. मुंबईच्या गोरेगाव पश्चिमेकडील एमजी रोड परिसरात मुसळधार पाऊस व वादळी वाऱ्यामुळे झाड कोसळल्याची घटना घडली आहे. या दुर्घटनेत एका तरुणाचा मृत्यू झाला आहे.

प्रेमलाल निर्मल (वय ३०) असे मृत तरुणाचं नाव आहे.  झाड कोसळून व्यक्तींचा मृत्यू होण्याची आज दिवसभरातील ही दुसरी घटना आहे.

आज सकाळी मालाड पश्चिम येथे एका खाजगी कंपाऊंडमध्ये पिपळाचे झाड कोसळल्याने कौशल्य दोशी या ३८ वर्षीय तरुणाचा मृत्यू झाला.

मंगळवार पहाटेपासूनच मुंबईत मुसळधार पावसाला सुरुवात झाली आहे. पावसासोबत जोरदार वारा देखील वाहत असल्याने जुनी झाडे कोसळल्याच्या घटना समोर येत आहेत. गोरेगाव एमजी रोड परिसरातील मीठानगर महापालिका कॉलनीत दुपारच्या सुमारास एका घरावर झाड कोसळल्याची घटना घडली.

या दुर्घटनेत बी २२ ए या घरात राहणाऱ्या ३० वर्षीय प्रेमलाल निर्मल या तरुणाला गंभीर दुखापत झाली. शेजाऱ्यांनी त्याला तात्काळ जवळच्या खासगी रुग्णालयात दाखल केले. मात्र तेथील डॉक्टरांनी तपासून त्याला मृत घोषित केले. याप्रकरणी पोलिसांनी अपघाती मृत्यूची नोंद केली आहे.