MPSC विद्यार्थ्यांसाठी मोठी बातमी! आयोगानं हट्ट सोडला! नवा अभ्यासक्रम २०२५ पासून लागू होणार

MPSC : एमपीएससीचा नवा अभ्यासक्रम तातडीनं लागू करण्याच्या विरोधात परीक्षार्थी विद्यार्थ्यांनी सुरू केलेल्या आंदोलनाचा मोठा विजय झाला आहे. नवा अभ्यासक्रम चालू वर्षापासूनच लागू करण्याचा हट्ट महाराष्ट्र लोकसेवा आयोगानं सोडला असून २०२५ पासून नव्या अभ्यासक्रमानुसार परीक्षा घेण्याचा निर्णय घेतला आहे.

आयोगाच्या अधिकृत ट्विटर अकाउंटवर याबाबतची माहिती देण्यात आली आहे. उमेदवारांची मागणी, कायदा व सुव्यवस्थेची निर्माण झालेली परिस्थिती व उमेदवारांना तयारीसाठी द्यावयाचा अतिरिक्त कालावधी विचारात घेऊन सुधारित परीक्षा योजना व अभ्यासक्रम सन २०२५ पासून लागू करण्यात येत आहे, असं आयोगानं स्पष्ट केलं आहे.

Shailaja Darade : शिक्षक भरती रॅकेट प्रकरणी परीक्षा परिषदेच्या आयुक्त शैलजा दराडे यांच्यावर गुन्हा

केंद्रीय लोकसेवा आयोगाच्या धर्तीवर एमपीएससीनं नवा अभ्यासक्रम तयार केला आहे. तसंच, परीक्षा पद्धतीतही बदल करण्यात आला आहे. हा बदललेला अभ्यासक्रम व वर्णनात्मक स्वरूपाची परीक्षा पद्धत यंदापासून सुरू करण्याचा आयोगाचा मानस होता. त्यास विद्यार्थ्यांनी विरोध केला होता. एमपीएससीची तयारी करणाऱ्या विद्यार्थ्यांनी यासाठी पुण्यात गेल्या काही दिवसांपासून बेमुदत आंदोलन सुरू केलं होतं. रात्रीच्या वेळेस हातात टॉर्च घेऊन विद्यार्थी रस्त्यावर ठाण मांडून होते.

HSC Exams : बारावीच्या परीक्षा केंद्रावर शुकशुकाट; फोन केला तरी विद्यार्थी पेपरला फिरकले नाहीत!

आमचा अभ्यासक्रमाला विरोध नाही, फक्त तयारीसाठी वेळ हवा, अशी त्यांची मागणी होती. विरोधी पक्षांनीही विद्यार्थ्यांच्या या आंदोलनाला पाठिंबा दिला होता. राष्ट्रवादी काँग्रेसचे अध्यक्ष शरद पवार यांनी स्वत: विद्यार्थ्यांची भेट घेऊन या संदर्भात चर्चा केली होती. काँग्रेसनंही याबाबत आक्रमक भूमिका घेतली होती. त्यामुळं सरकार दरबारी तातडीनं हालचाली सुरू झाल्या. राज्य लोकसेवा आयोगाला पत्र पाठवण्यात आल्याचं मुख्यमंत्री एकनाथ शिंदे यांनी सांगितलं होतं. त्याचा परिणाम अखेर दिसून आला आहे.