Accident : पुणे-नाशिक महामार्गावर ट्रक व कारचा भीषण अपघात, ४ जण जागीच ठार

नाशिक पुणे महामार्गावर कार व ट्रकमध्ये झालेल्या भीषण अपघातात चार जणांचा मृत्यू झाला आहे. संगमनेर तालुक्यातील चंदनापुरी गावाजवळ रविवारी सायंकाळच्या सुमारास हा भीषण अपघात घडला. माल वाहतूक ट्रक कारवर कोसळल्याने कार ट्रकखाली चिरडली गेली. या अपघातात अकोले तालुक्यातील चार जणांचा मृत्यू जागीच मृत्यू झाला. 

पुणे-नाशिक महामार्गावर अपघातांच्या घटना वाढल्या असून हा महामार्ग मृत्यूचा सापळा ठरत आहे. ट्रकवर भरधाव जीप आदळून झालेल्या अपघातात एकाट कुटूंबातील तीन जणांचा मृत्यू झाल्याची घटना ताजी असतानाच आज आणखी एक अपघात झाला आहे. नाशिक पुणे महामार्गावर भरधाव ट्रक कारवर आदळल्याने कारमधील चार जणांचा जागीच मृत्यू झाला आहे. 

अपघाताची माहिती मिळताच स्थानिक नागरिक व पोलीस घटनास्थळी दाखल झाले. ग्रामस्थांच्या मदतीने पोलिसांनी तत्काळ बचावमोहीम सुरू केली. हा अपघात इतका भीषण होता की ट्रकखाली दबून चक्काचूर झालेल्या कारमधून मृतदेह बाहेर काढण्यासाठी क्रेन बोलवावी लागली. क्रेनने कार तोडून मृतदेह बाहेर काढण्यात आले. या अपघातामुळे महामार्गावर वाहनांच्या लांबच लांब रांगा रागल्या होत्या. अपघातानंतर ट्रक चालक घटनास्थळावरुन फरार झाला. दोन्ही वाहने रस्त्यावरून बाजुला करून महामार्गावरील वाहतूक पूर्ववत करण्यात आली.