..या कारणामुळे अखेर ठाकरे सरकारकडून मनसे अध्यक्ष राज ठाकरेंच्या सुरक्षेत वाढ

मुंबई – मनसेच्या गुढीपाडवा मेळाव्यात व त्यानंतर ठाण्यातील उत्तरसभा तसेच औरंगाबाद येथील सभेत राज ठाकरेंनी मशिदींवरील भोंगे व अजानबाबत आपली भूमिका स्पष्ट केल्यानंतर राज्यातील राजकरण तापलं होतं. त्यातच मनसे अध्यक्ष राज ठाकरेंना जीवे मारण्याची धमकी मिळाल्यानंतर त्यांच्या सुरक्षा व्यवस्थेत वाढ करण्यात आली आहे. राज ठाकरेंना जीवे मारण्याची धमकी मिळाल्यानंतर राज्य सरकारने सुरक्षा वाढवण्याचा निर्णय घेतला आहे. मनसे नेते बाळा नांदगावकर यांनी गृहमंत्री दिलीप वळसे पाटील यांची भेट घेत धमकीचं पत्र मिळाल्याची माहिती दिली होती. त्यानंतर राज्य सरकारने हा निर्णय घेतला आहे.

वाय प्लस दर्जाची सुरक्षा कायम -

मनसे अध्यक्ष राज ठाकरेंना आधीच वाय प्लस दर्जाची सुरक्षा आहे. राज्य सरकारने वाय प्लस दर्जाची सुरक्षा कायम ठेवली असून फक्त पोलिसांच्या संख्येत वाढ केली आहे. एक अतिरिक्त पोलीस अधिकारी आणि अंमलदार राज ठाकरेंच्या सुरक्षेसाठी तैनात असतील.

..तर महाराष्ट्र पेटेल, मनसेचा इशारा -

बाळा नांदगावकर यांनी राज ठाकरेंना जीवे मारण्याची धमकी मिळाली असल्याची माहिती बुधवारी दिली होती. यावेळी त्यांनी राज ठाकरेंच्या केसाला जरी धक्का लागला तर महाराष्ट्र पेटेल असा इशारा दिला होता. धमकीच्या पत्रामध्ये उर्दू शब्दांचा वापर करण्यात आले असल्याचं बाळा नांदगावकर यांनी सांगितले होतं.

बाळा नांदगावकर यांनी सांगितले की, अजानबाबत तुम्ही जे करत आहात ते बंद करा, अन्यथा तुम्हाला ठार करु. तुम्हाला तर सोडणार नाहीच पण राज ठाकरेंनाही मारुन टाकू,” असं पत्रात लिहिलं असल्याची माहिती नांदगावकरांनी यावेळी दिली होती. हे हिंदी पत्र असून त्यात उर्दू शब्दही आहेत असं त्यांनी सांगितले होतं.