Maharahtra Rain : पुढील २४ तास महत्वाचे.. 'आषाढी' च्या दिवशी राज्यात अतिवृष्टीचा इशारा, ‘या’ जिल्ह्यांना ऑरेंज अलर्ट

Maharashtra Heavy Rain : राज्यात यंदा मान्सूनने उशिराने एंट्री केली असली तरी मागील दोन दिवसापासून मुंबई, ठाणे, पुण्यासह राज्यातील अनेक जिल्ह्यात जोरदार बरसला आहे. पावसाचा जोर वाढत असून मुंबई, पुण्यासह कोकण मध्य महाराष्ट्रात पावसाने धुमाकूळ घातला आहे. पावसाच्या आगमनाने बळीराजा सुखावलाअसला तरी अनेक ठिकाणांहून पडझडीच्या बातम्या येत आहेत. त्यातच आता येत्या २४ तासांत राज्यात पावसाचा जोर आणखीच वाढणार, असा अंदाज हवामान खात्याने वर्तवला आहे.

हवामान खात्याने उद्या म्हणजेच२९जूनला ऑरेंज अलर्ट दिला आहे, त्यामुळे राज्यातल्या काही जिल्ह्यांमध्ये मुसळधार ते अतिमुसळधार पाऊस पडण्याचा अंदाज आहे.

हवामान विभागाने शुक्रवारी रत्नागिरी, रायगड, ठाणे, पालघर, मुंबई, नाशिक, पुणे आणि सातारा या जिल्ह्यांसाठी ऑरेंज अलर्ट दिला आहे.त्यामुळे या भागात उद्या मुसळधार ते अतिमुसळधार पाऊस कोसळू शकतो. दुसरीकडे कोल्हापूर, सिंधुदुर्ग, जळगाव आणि नंदुरबार जिल्ह्याला यलो अलर्ट देण्यात आला आहे.

दरम्यान, मुंबईसह उपनगरात पहाटेपासून पावसाची जोरदार बॅटिंग सुरू आहे. पावसामुळे लोकल सेवेवरही परिणाम झाला असून अनेक गाड्या विलंबाने धावत आहेत. यामुळे चाकरमान्यांची चांगलीच तारांबळ उडाली आहे.

जोरदार पावसामुळे अंधेरी सबवे परिसरात पाणी साचलं होतं.ठाण्यातही मुसळधार पावसामुळे काही ठिकाणी पाणी साचलंअसून अनेक ठिकाणी पडझडीच्या घटना घडल्या आहेत.