BMC Shiv Sena Office : बीएमसीतील कार्यालयावर हक्क कोणाचा?; ठाकरे-शिंदे गटात मोठा राडा

ShivSena Office In BMC : मुंबई महापालिकेची निवडणूक जवळ आलेली असतानाच आता पालिकेतील कार्यालयावरून ठाकरे आणि शिंदे गट आमने-सामने आले आहेत. मुंबई महापालिकेतील शिवसेनेच्या कार्यालयावर ठाकरे आणि शिंदे गटाच्या माजी नगरसेवकांनी दावा केला, त्यानंतर दोन्ही गटातील नेते आणि कार्यकर्त्यांनी एकमेकांविरोधात जोरदार घोषणाबाजी केल्यानं पालिकेतील राजकीय वातावरण चांगलंच तापल्याचं पाहायला मिळालं. पालिकेच्या सुरक्षारक्षकांना मध्यस्थी करत दोन्ही गटातील वाद मिटवला आहे.

मिळालेल्या माहितीनुसार, शिंदे गटाचे खासदार राहुल शेवाळे, स्थायी समितीचे माजी अध्यक्ष यशवंत जाधव, शीतल म्हात्रे आणि नरेश म्हस्के या नेत्यांनी पालिकेत येऊन शिवसेनेच्या कार्यालयावर दावा ठोकला. त्यानंतर कार्यालयाबाहेरील बोर्ड बदलून ऑफिसमधील सभागृह गाठलं. त्यानंतर या घटनेची माहिती मिळताच ठाकरे गटाचेही माजी नगरसेवक आणि नेते पालिकेत दाखल झाल्यानंतर दोन्ही गटाच्या कार्यकर्त्यांनी एकमेकांविरोधात जोरदार घोषणाबाजी करायला सुरुवात केली. त्यानंतर प्रकरण हाताबाहेर जात असल्याचं लक्षात येताच पालिकेतील सुरक्षारक्षकांनी ऐनवेळी मध्यस्थी करत वाद मिटवला. त्यानंतर दोन्ही गटाचे नेते त्यांच्या पुढील कार्यक्रमासाठी रवाना झाले.

Pune PMP bus Accident : पुण्यात पीएमपीएमएल बसचा ब्रेक फेल; पाच ते सात गाड्यांना उडवले, नागरिक जखमी

मुंबई महापालिकेत कोणत्याही पक्षाचा नगरसेवक सध्या नसल्यानं शिवसेनेच्या कार्यालयात कुणालाही बसून न देण्याची मागणी महापालिकेच्या आयुक्तांकडे करणार असल्याचं वक्तव्य शिवसेनेचे आमदार सुनील शिंदे यांनी केली आहे. गेल्या काही दिवसांपासून ठाकरे आणि शिंदे गटात संसदेतील शिवसेनेच्या कार्यालयावरून वाद होत असतानाच आता मुंबई महापालिकेतही दोन्ही गटात ऑफिसवरून संघर्ष झाल्यामुळं त्याचे हिवाळी अधिवेशनात पडसाद उमटण्याची चिन्ह आहेत.