Udayan Raje : सातारा बाजार समितीत उदयनराजेंना पराभवाचा धक्का, शिवेंद्रराजे म्हणाले आता..

सातारा – साताऱ्यातील दोन राजेंचा वाद सर्वविदित आहे. साखर कारखान्याच्या निवडणुकीनंतर सातारा बाजार समितीच्या निवडणुकीत दोन राजे एकमेकांसमोर उभे ठाकले होते. बाजार समिती निवडणुकीत आमदार शिवेंद्रराजेंच्या गटाने बाजी मारत खासदार उदयनराजे यांच्या गटाला चारीमुंड्या चीत केले आहे. आमदार शिवेंद्रराजे यांच्या गटाने सर्व १८ जागा जिंकून बाजार समितीवर निर्विवाद वर्चस्व राखले आहे. या निवडणुकीत उदयनराजे यांच्या गटाचा सुपडा साफ केल्यानंतर शिवेंद्रराजे यांनी विश्वास व्यक्त केला की, ज्या पद्धतीने बाजार समितीतून हद्दपार केले आहे, तसेच नगरपालिकेतूनही त्यांना हद्दपार केले जाईल.

सातारा बाजार समितीमधील पराभव खासदार उदयनराजेंना मोठा धक्का मानला जात आहे. आमदार शिवेंद्रराजे भोसले या विजयावर प्रतिक्रिया देताना म्हटले की, खासदार उदयनराजे भोसले यांच्या गटाची मतदारांनी धुळधाण केली आहे. फक्त पदे भोगायची, लोकांची कामे करायची नाहीत. यामुळेच मतदारांनी त्यांना नाकारलं असून उदयनराजेंचा मार्केट कमिटीची जागा हडपण्याचा डाव आम्ही हाणून पाडला आहे.

Ajit Pawar : दोन ते तीन दिवसांत अजित पवार फायनल निर्णय घेतील, मुख्यमंत्र्यांच्या विश्वासू आमदाराचं भाकित

बाजार समितीमधील विजयानंतर शिवेंद्रराजे म्हणाले की, आगामी नगरपालिकेच्या निवडणुकीतही उदयनराजेंना अशाच पराभवाचा सामना करावा लागेल. त्यांच्या भ्रष्टाचारी कारभाराला जनता वैतागली आहे.

उदयनराजेंची मतदारसंघातील ताकत भाजपच्या वरिष्ठ नेत्यांनाही कळली असून या निवडणुकीनंतर खासदारकीच्या संदर्भात भाजपाचे वरिष्ठच आता निर्णय घेतील, असा टोलाही शिवेंद्रराजे यांनी लगावला.