Anil Parab : अनिल परब यांना ईडीचा धक्का, साई रिसॉर्ट प्रकरणी १०.२० कोटींची संपत्ती जप्त

मुंबई -  शिवसेना उद्धव ठाकरे गटाचे नेते अनिल परब यांना ईडीने पुन्हा दणका दिला आहे. दापोलीतील साई रिसॉर्ट प्रकरणी ईडीने परब यांची संपत्ती जप्त केली आहे. ईडीकडून मिळालेल्या माहितीनुसार १०. २० कोटी रूपयांची संपत्ती जप्त करण्यात आली आहे. ईडीने ट्विट करून या कारवाईची माहिती दिली आहे. 

या कारवाईवर अनिल परब यांनी प्रतिक्रिया दिली असून, या प्रकरणाशी माझा काही संबंध नाही. तसेच ईडीने संपत्ती जप्तीची कारवाई केली असल्यास आपण त्याविरोधात न्यायालयात दाद मागणार असल्याचे अनिल परब यांनी म्हटले आहे.  

ईडीने केलेल्या ट्विटनुसार मनी लाँड्रिंग प्रकरणात उद्धव ठाकरे गटाचे नेते अनिल परब यांची १०.२० कोटी रुपयांची मालमत्ता तात्पुरत्या स्वरुपात जप्त केली आहे. जप्त करण्यात आलेल्या संपत्तीत दापोलीतील ४२ गुंठे जमीन आणि साई रिसॉर्ट या इमारतीचा समावेश आहे. पर्यावरण मंत्रालयाच्या तक्रारीनंतर ईडीने ही कारवाई केली आहे.

ईडीकडून यापूर्वीही दापोलीतील साई रिसॉर्टशी संबधीत प्रकरणात अनिल परब यांची अनेक वेळा चौकशी झाली आहे. त्याचबरोबर साई रिसॉर्टप्रकरणी ईडीने सात ठिकाणी छापेमारी देखील केली होती. भाजप नेते किरीट सोमय्या यांनी साई रिसॉर्टप्रकरणी आरोप केल्यानंतर ईडीने कारवाईचे सत्र सुरू केले होते.