Ahmednagar News : मित्रांसह पिकनिकला गेलेल्या तरुणीचा सांदण दरीत पडून मृत्यू

सलग सुट्ट्यांमळे राज्यातील सर्व पर्यटनस्थळे लोकांच्या गर्दीने फुलली आहेत. पिकनिकच्या ठिकाणी अतिउत्साही पर्यटकांमुळे अपघाताच्या घटना घडत असतात. अशीच एक दु:खद घटना अहमदनगर जिल्ह्यातून समोर आली आहे. सांदण दरी पाहण्यासाठी आलेल्या एका पर्यटक तरुणीचा मृत्यू दरीत कोसळून मृत्यू झाला आहे. ऐश्वर्या खानविलकर (२४ वर्षे) असं या मृत तरुणीचं नाव आहे.

रविवारी सकाळी ११वाजण्याच्या सुमारास ही दुर्दैवी घटना घडली आहे. ऐश्वर्या आपल्या मित्र-मैत्रिणींसह सांदण दरी पाहण्यासाठी आली होती. सलग सुट्ट्या असल्याने तिच्या मित्र परिवाराने पिकनिकचा प्लान केला होता. आज सकाळीच ते सांदण दरीजवळ पोहोचले. यावेळी ऐश्वर्याचा पाय घसरला व ती खोल दरीत कोसळली. 

दरीत डोकावून पाहताना ही तरुणी खाली पडली. त्यावेळी तिच्या आजुबाजूला तिला पटकन सावरण्यासाठी कोणीच नव्हतं. त्यामुळे ती खोल दरीत कोसळली. बऱ्याच उंचावरून दरीत पडल्याने तिच्या हातापायांना तसेच डोक्याला गंभीर मार लागला व जागीच तिचा मृत्यू झाला. घटनेची माहिती मिळताच पोलिसांनी घटनास्थळी धाव घेतली.  स्थानिकांच्या मदतीने मुलीचा मृतदेह दरीतून वर काढला. शवविच्छेदन करून मृतदेह नातेवाईकांच्या ताब्यात देण्यात आला.