यश-नेहाचा विवाह सोहळा आज पुन्हा, व्यत्ययासाठी 'झी'ने मागितली माफी

झी मराठीवरील अतिशय लोकप्रिय मालिका माझी तुझी रेशीमगाठ याचा काल, १२ जून रोजी यश आणि नेहा यांचा विवाह विशेष भाग होता. पण मालिका दरम्यान दोन वेळा अर्धा तासाचे ब्रेक लागल्याने प्रेक्षक चांगलेच भडकले. आज झी मराठीने त्यांच्या इंस्टा पेजवरून प्रेक्षकांची माफी मागितली असून, तो एपिसोड पुन्हा प्रसारित करण्यात येणार असल्याचे जाहिर केले आहे.

माझी तुझी रेशीमगाठ मालिकेतील यश आणि नेहा यांच्या विवाह सोहळ्यासाठी, रविवारी दोन तासांचा विशेष भाग होता. या महाएपिसोड दरम्यान दोन वेळा अर्ध्या अर्ध्या तासांचे ब्रेक लागले. तसेच हा एपिसोड ४० मिनीटे उशिरा संपला. यामुळे प्रेक्षक चांगलेच संतापले होते. प्रेक्षकांनी इंस्टा अकाउंटवरून आपला राग व्यक्त करत प्रेक्षकांना गृहीत धरू नका अशाच प्रतिक्रिया दिल्या. पण नेमकी हाय काय प्रकार होता, याबाबत कोणालाच काहीच स्पष्ट कळत नव्हते.

झी मराठीने याबाबत सोमवारी, १३ जून रोजी इंस्टाग्रामवरील ऑफिशियल पेजवरून माहित देत प्रेक्षकांची माफी मागितली. त्यांनी पोस्ट मध्ये काही तांत्रिक अडचणींमुळे या विवाह विशेष भागात व्यत्यय आला असल्याचे सांगितले.

तसेच रसिकांना या विवाह विशेष भागाचा आनंद आज पुन्हा घेता येणार असल्याचे सांगितले. रसिकांना हा आनंद सोहळा १३ जून रोजी सकाळी १० वाजता आणि संध्याकाळी ४ वाजता दाखवणार असल्याचे त्यांनी पोस्ट मध्ये सांगितले आहे. हा महाएपिसोड आज होणार असल्याची देखील पोस्ट केली आहे.