Sara Tendulkar Deepfake: रश्मिकानंतर सारा तेंडुलकर 'डीपफेक'ची बळी, शुभमन गिलसोबतचा फोटो व्हायरल

Sara Tendulkar and Shubhaman Gill morphed photo: काही दिवसांपूर्वी दाक्षिणात्य अभिनेत्री रश्मिका मंदानाचा डीपफेक व्हिडीओ व्हायरल झाला होता. त्यानंतर आर्टीफिशिअल इंटलिजन्सच्या चुकीच्या वापराबाबत चिंता व्यक्त केली जाऊ लागली आहे. अशात सचिन तेंडुलकरची मुलगी सारा तेंडुलकरचा देखील एक फोटो व्हायरल झाला आहे. या फोटोमध्ये सारा शुभमन गिलसोबत दिसत आहे.

सारा तेंडुलकरचे नाव हे क्रिकेटपटू शुभमन गिलशी जोडले जात आहे. अशातच तिचा एक फोटो सोशल मीडियावर व्हायरल झाला आहे. या फोटोमध्ये ती शुभमनच्या खांद्यावर हात ठेवताना दिसत आहे. तसेच हा फोटो शेअर करत एका यूजरने 'साराने शुभमनसोबतच्या नात्यावर शिक्का मोर्तब केले आहे' असे कॅप्शन दिले आहे. हा फोटो सोशल मीडियावर व्हायरल होताच फेक असल्याचे समोर आले.
वाचा: रश्मिकाच्या ‘त्या’ व्हिडीओमुळे मोदी सरकार अॅक्शन मोडमध्ये, दोषीला देणार 'ही' शिक्षा

साराचा खरा फोटो कोणासोबत?

सारा आणि शुभमनचा हा फोटो फेक आहे. खऱ्या फोटोमध्ये सारासोबत या फोटोमध्ये तिचा भाऊ अर्जुन आहे. २४ सप्टेंबर रोजी साराने अर्जुनच्या वाढदिवशी हा फोटो शेअर केला होता. हा फोटो शेअर करत तिने अर्जुनला शुभेच्छा दिल्या होत्या. आता हा फोटो बदलून अर्जुनच्या जागी शुभमनचा चेहरा वापरण्यात आला आहे.

रश्मिकाचे डीपफेक व्हिडीओ प्रकरण काय आहे?

रश्मिकाच्या एका चाहत्याने एक्स अकाऊंटवर खरा आणि फेक असे दोन व्हिडीओ शेअर केले आहेत. पहिल्या व्हिडीओमध्ये झारा पटेल नावाची महिला डिप नेक काळ्या रंगाचा आऊटफिट घालून लिफ्टमध्ये एण्ट्री करताना दिसते. तर दुसऱ्या व्हिडीओमध्ये डीप फेक तंत्रज्ञानाचा वापर करुन झाराच्या चेहऱ्यावर रश्मिकाचा चेहरा लावण्यात आला आहे. पत्रकार अभिषेक कुमार यांनी हा प्रकार उघकीस आणला आहे.