Sanjay Dutt: बी ग्रेड सिनेमात काम करणाऱ्या मान्यताच्या प्रेमात कसा पडला संजूबाबा

Sanjay Dutt Birthday Today: 'लगे रहो मुन्नाभाई' या चित्रपटातून प्रेक्षकांच्या मनावर अधिराज्य गाजवणारा अभिनेता म्हणजे संजय दत्त. आजवर संजय दत्तने अनेक चित्रपटांमध्ये काम केले आहे. त्याच्या अनेक भूमिका हिट ठरल्या होत्या. संजय दत्तच्या आयुष्यात अनेक चढ-उतार आले. पण त्याचे मन जिंकले ते मान्यताने. आज २९ जुलै रोजी संजय दत्तचा वाढदिवस आहे. त्यानिमित्ताने जाणून घेऊया संजय दत्तची प्रेम कहाणी...

संजय दत्तने १९८१ साली प्रदर्शित झालेल्या 'रॉकी' या चित्रपटातून बॉलिवूडमध्ये पदार्पण केले. त्यानंतर १९८७ साली त्याने ऋचा शर्माशी लग्न केले. ऋचा आणि संजय दत्तला त्रिशाला नावाची मुलगी आहे. पण संजय आणि ऋचा यांचे नाते फार काळ टिकले नाही. त्यांनी घटस्फोट घेतला. घटस्फोटानंतर ऋचा अमेरिकेत आई-वडिलांसोबत राहत होती. त्यानंतर संजय दत्तचे नाव माधुरी दीक्षितशी जोडले गेले.

'थानेदार' चित्रपट करत असतान संजय दत्त माधुरीच्या सौंदर्यावर फिदा झाला होता. पण १९९३ साली संजय दत्तच्या आयुष्यात मोठे वादळ आले. त्याला अटक झाली होती. संजय दत्त तुरुंगात असताना माधुरी त्याला एकदाही भेटायला गेली नाही. याच काळात संजय दत्तच्या पहिल्या पत्नीचे निधन देखील झाले. दरम्यान, संजयला भेटण्यासाठी मॉडेस रिया पल्लई तुरुंगात जायची. एका मंदिरात जाऊन संजय दत्तने तिच्याशी लग्न केले होते. पण नंतर संजय दत्त नाडिया दुरानीच्या प्रेमात पडला. त्यामुळे संजय दत्तची दुसरी पत्नी त्याच्यापासून विभक्त झाली.

संजय परत एकटा पडला होता. त्यानंतर संजय दत्तचा एका मुलीसोबतचा व्हिडीओ समोर आला होता. पण त्यामध्ये त्या मुलीचा चेहरा नीट दिसत नव्हता. स्टार स्क्रीन अवॉर्डमध्ये संजय दत्त याच मुलीला म्हणजे मान्यताला घेऊन गेला होता. त्यावेळी त्यांच्या अफेअरच्या चर्चा रंगल्या होत्या. नोव्हेंबर २००६मध्ये संजय दत्त आणि मान्यताने लग्न केल्याचे समोर आले होते. मान्यताने काही बी ग्रेड चित्रपटांमध्ये काम केले.