multibagger stock : अवघ्या ७५ दिवसांत पैसे दुप्पट! सोनं विकणाऱ्या कंपनीनं गुंतवणूकदारांचं नशीब चमकवलं

Senco Gold Share price : अवघ्या अडीच महिन्यांपूर्वी शेअर बाजारात सूचीबद्ध झालेल्या सेन्को गोल्ड या कंपनीच्या शेअरनं गुंतवणूकदारांचं नशीब चमकवलं आहे. कंपनीच्या शेअरनं झपाझप वाटचाल करत अवघ्या ७५ दिवसांत गुंतवणूकदारांना दामदुप्पट नफा मिळवून दिला आहे.

सेन्को गोल्ड या कंपनीचा आयपीओ जुलै महिन्यात आला होता. सूचीबद्ध झाल्यापासून एखाद्या दिवसाचा अपवाद वगळता कंपनीचा शेअर सातत्यानं वधारत गेला आहे. आज या शेअरमध्ये तब्बल १४.४० टक्क्यांची, अर्थात ७६.७० रुपयांची वाढ नोंदवली. एनएसईवर या शेअरनं ६०० रुपयांचा टप्पा पार केला.

हेही वाचा: ऑक्टोबरमध्ये बँकांना भरपूर सुट्ट्या; यादी पाहा अन् पटापट नियोजन करा!

सेन्को गोल्डचा शेअर एनएसईवर आज ५३३.४० रुपयांवर खुला झाला. त्यानंतर वाढत-वाढत एका क्षणी हा शेअर ६२६ रुपयांवर पोहोचला. कंपनीचा हा ५२ आठवड्यांचा उच्चांक होता. बाजार बंद झाला तेव्हा हा शेअर ६०९.३० रुपयांवर स्थिरावला. काल, मंगळवारी सेन्को गोल्डचा शेअर ५३२.३५ रुपयांवर बंद झाला होता.

IPO ची किंमत काय होती?

सेन्को गोल्डचा आयपीओ ४ जुलै ते ६ जुलै दरम्यान खुला झाला होता. कंपनीच्या आयपीओची किंमत ३०१ ते ३१७ रुपये होती. कंपनीच्या आयपीओची लॉट साइज ४७ शेअर्स अशी होती. त्यामुळं गुंतवणूकदारांना किमान १४,८९९ रुपये गुंतवणं गरजेचं होतं. बीएसई व एनएसई दोन्ही शेअर बाजारात हा आयपीओ सूचीबद्ध झाला. आयपीओद्वारे संस्थात्मक गुंतवणूकदारांच्या माध्यमातून कंपनीनं १२१.५० कोटी रुपये उभे केले होते.

सेन्को गोल्ड बीएसईवर ४३१ आणि एनएसईवर ४३० रुपये प्रति शेअर दरानं सूचीबद्ध झाला होता. लिस्टिंगच्या दिवशीच या शेअरनं गुंतवणूकदारांना १०० रुपयांपेक्षा जास्त नफा मिळवून दिला होता.

हेही वाचा: तीन रुपयांवरून ५,७०० रुपयांवर पोहोचला 'हा' शेअर, कमाईची मोजदादच नाही!