FIFA Womens World Cup Final : स्पेनने जिंकला महिला फिफा वर्ल्डकप, थरारक फायनलमध्ये इंग्लंडचा धुव्वा

Spain won the FIFA Womens World Cup Final : स्पेनने महिला फिफा विश्वचषक २०२३ चे विजेतेपद पटकावले आहे. ऑस्ट्रेलियातील सिडनी स्टेडियमवर खेळल्या गेलेल्या अंतिम सामन्यात स्पेनने इंग्लंडचा १-० असा पराभव केला.

 स्पेनची कर्णधार ओल्गा कार्मोना हिने २९व्या मिनिटाला सामन्यातील एकमेव गोल करून आपल्या संघाला चॅम्पियन बनवले. स्पॅनिश संघ प्रथमच महिला फिफा विश्वचषक चॅम्पियन बनला आहे. हा संघ प्रथमच या स्पर्धेचा अंतिम सामना खेळत होता आणि पहिल्याच अंतिम फेरीत त्यांनी इंग्लंडसारख्या बलाढ्य संघाचा पराभव केला. तथापि, इंग्लंडचीदेखील पहिलीच विश्वचषक फायनल होती.

महिला फिफा विश्वचषक जिंकणारा स्पेनचा संघ पाचवा संघ ठरला आहे. याआधी अमेरिकेने ४ वेळा, जर्मनीने दोनदा, नॉर्वे आणि जपानने प्रत्येकी एकदा महिला फिफा विश्वचषक विजेतेपद पटकावले आहे. त्याचबरोबर इंग्लंड संघाचीही हीच सर्वोत्तम कामगिरी आहे. याआधी २०१५ मध्ये इंग्लंडने तिसरा क्रमांक पटकावला होता.

स्पेनच्या महिला संघाने फिफा विश्वचषक विजेतेपदाच्या बाबतीत त्यांच्याच देशाच्या पुरुष संघाची बरोबरी केली आहे. स्पेनच्या पुरुष संघानेही केवळ एकदाच फिफा विश्वचषकाचे विजेतेपद पटकावले आहे. २०१० मध्ये त्यांनी हे केले होते. यानंतर आता तब्बल १३ वर्षांनंतर स्पेनचा महिला संघही चॅम्पियन बनला आहे.