Shoaib Akhtar Biopic : शोएब अख्तरने बायोपिक सोडला, निमार्त्यांनाही दिली कडक वॉर्निंग

पाकिस्तानचा माजी वेगवान गोलंदाज शोएब अख्तर पुन्हा एकदा चर्चेत आला आहे. काही काळापूर्वी शोएब अख्तरच्या जीवनावर रावळपिंडी एक्सप्रेस नावाचा चित्रपट येत असल्याची घोषणा करण्यात आली होती. आता शोएब अख्तरने या बायोपिकमधून माघार घेत असल्याचे जाहीर केले आहे. अख्तरने चित्रपट निर्मात्यांवर गंभीर आरोप केले आहेत.

शोएब अख्तरने सोशल मीडियावर चाहत्यांना याची माहिती दिली. शोएब अख्तर म्हणाला की, मला अत्यंत दुःखाने कळवावे लागत आहे की, अनेक महिन्यांच्या चर्चेनंतर मी रावळपिंडी एक्सप्रेस या चित्रपटापासून वेगळा झालो आहे.

यासोबतच शोएब अख्तरने निर्मात्यांना इशाराही दिला आहे, त्याने लिहिले की, जर चित्रपट निर्मात्यांनी चित्रपट पुढे नेला, किंवा माझ्या नावावर किंवा माझ्याशी संबंधित कोणतीही कथा बनवली तर त्यांच्यावर कायदेशीर कारवाई केली जाईल.

या चित्रपटात शोएब अख्तरची भूमिका साकारणारा अभिनेता उमीर जसवालनेही चित्रपट सोडला आहे. या महिन्याच्या सुरुवातीला, उमीरने जाहीर केले होते की चित्रपट निर्मात्यांसोबतच्या आशयावरून झालेल्या वादामुळे त्याने रावळपिंडी एक्सप्रेस सोडण्याचा निर्णय घेतला आहे.

शोएब अख्तरची गणना जगातील सर्वात वेगवान आणि धोकादायक गोलंदाजांमध्ये केली जाते. तो पाकिस्तानच्या सुपरस्टार क्रिकेटपटूंपैकी एक आहे. तसेच, क्रिकेट सोडल्यानंतर तो कॉमेंट्री आणि यूट्यूब चॅनलच्या माध्यमातून सतत चर्चेत राहतो.