PAK vs ENG Melbourne Weather: मेलबर्नमध्ये आकाशात काळ्या ढगांची गर्दी, सामना राखीव दिवशी होणार?

T20 World Cup 2022 Final; England Vs Pakistan: T20 विश्वचषक २०२२चा अंतिम सामना आज इंग्लंड आणि पाकिस्तान यांच्यात खेळवला जाणार आहे, परंतु पाऊस पुन्हा एकदा या स्पर्धेत अडथळा ठरू शकतो. या स्पर्धेत पावसामुळे अनेक सामने रद्द झाले आणि अनेक सामन्यांचे निकाल डकवर्थ लुईस नियमानुसार लागला आहे. आता अंतिम सामन्यातही पाऊस अडथळा ठरू शकतो. आयसीसीने अंतिम सामन्यासाठी राखीव दिवसही ठेवला आहे. पण  राखीव दिवशीदेखील पावसाची शक्यता खूप जास्त आहे.

मेलबर्नमध्ये सध्या हलका पाऊस पडत आहे, तर संपूर्ण शहर काळ्या ढगांनी वेढले आहे. अंतिम सामन्यादरम्यान पावसाबद्दल सतत चर्चा होत असून क्रिकेट चाहत्यांना हवामानात सुधारणा होण्याची अपेक्षा आहे. तथापि, मेलबर्नमधील हवामानात कोणतीही सुधारणा दिसून येत नाही.

संध्याकाळी देखील पावसाचा अंदाज

मेलबर्नमध्ये सायंकाळी साडेपाच वाजल्यापासून पावसाची संततधार सुरु होण्याची शक्यता हवामान खात्याने वर्तवली आहे. ऑस्ट्रेलियाच्या वेळेनुसार सामना सायंकाळी ७ वाजता सुरू होणार असून, दीड तास आधी पाऊस सुरू झाला, तर सामना वेळेवर सुरू करणे शक्य होणार नाही. 

ICC ने पावसामुळे राखीव दिवशी सामन्याची वेळ वाढवली आहे. सामन्याचा निकाल लागावा, या आशेने ICC ने राखीव दिवशी अतिरिक्त २ तास वाढवून दिले आहेत. आज पावसामुळे सामना होऊ शकला नाही तर हा सामना सोमवारी (राखीव दिवशी) होईल. सोमवारसाठी ऑस्ट्रेलियन वेळेनुसार दुपारी ३.०० ची वेळ ठेवण्यात आली असून त्यात २ तासांचा अतिरिक्त वेळ देण्यात आला आहे. मात्र, सोमवारीही मुसळधार पाऊस पडण्याची शक्यता असून, अशा स्थितीत दोन्ही दिवशी सामन्यांचे आयोजन करण्याचे मोठे आव्हान स्पर्धेच्या आयोजकांसमोर आहे.