PAK vs ENG Test: डेड पीचवर इंग्लंडनं पाकिस्तानला पाजलं पाणी, शेवटच्या सत्रात पहिली कसोटी जिंकली

पाकिस्तान आणि इंग्लंड यांच्यात कसोटी मालिका सुरू आहे. मालिकेतील पहिला कसोटी सामना रावळपिंडी येथे खेळला गेला. या कसोटी सामन्यात इंग्लंडने पाकिस्तानचा ७४ धावांनी पराभव केला आहे. सामन्याच्या पहिल्या दिवसापासून रावळपिंडीची पीच चर्चेत आहे. या पीचवर प्रचंड टीका झाली आहे. तसेच, अशा पिचवर सामन्याचा निकाल लागणे अशक्य असल्याचे अनेकांनी म्हटले होते. 

दरम्यान, पहिल्या कसोटीत इंग्लंडने पाकिस्तानसमोर विजयासाठी ३४३ धावांचे लक्ष्य ठेवले होते. प्रत्युत्तरात पाकिस्तानचा संघ पाचव्या दिवशी २६८ धावांवर गारद झाला. पाचव्या आणि शेवटच्या दिवशी पाकिस्तानला विजयासाठी ९० षटकात २६३ धावांची गरज होती. तर इंग्लंडला विजयासाठी ८ विकेट्स घ्यायच्या होत्या.

त्यापूर्वी, इंग्लंडने आपला दुसरा डाव चौथ्या दिवशी चहापानाआधी ७ बाद २६३ धावांवर घोषित केला होता. यानंतर यानंतरच या सामन्याचा निकाल लागू शकतो, अशी शक्यता निर्माण झाली. 

इंग्लंडच्या पहिल्या डावात ६५७ धावा

दरम्यान, या कसोटीत नाणेफेक जिंकून प्रथम फलंदाजी करताना इंग्लंडने पहिल्या डावात ६५७ धावा केल्या होत्या. इंग्लिश संघाच्या ४ फलंदाजांनी शतके झळकावली. यामध्ये जॅक क्रोली (१२२), बेन डकेट (१०७), ऑली पोप (१०८) आणि हॅरी ब्रूक (१५३) यांचा समावेश आहे.

प्रत्युत्तरात पाकिस्तानच्या ५७९ धावा

प्रत्युत्तरात पाकिस्तानने पहिल्या डावात ५७९ धावा केल्या. त्यांच्याकडून अब्दुल्ला शफीकने ११४, तर इमाम-उल-हकने १२१ धावा केल्या. तसेच,  कर्णधार बाबर आझमने १३६ धावांचे योगदान दिले. अशाप्रकारे दुसऱ्या डावात इंग्लंड ७८ धावांची आघाडी घेऊन मैदानात उतरला होता.

इंग्लंडचा दुसरा डाव २६४ धावांवर घोषित

दुसऱ्या डावात इंग्लंडने सात गड्यांच्या मोबदल्यात २६४ धावा करून डाव घोषित केला. जो रूटने ७३ आणि हॅरी ब्रूकने ८७ धावा केल्या. त्याचवेळी जॅक क्रॉलीने ५० धावा केल्या. अशाप्रकारे इंग्लिश संघाला एकूण ३४२ धावांची आघाडी मिळाली आणि संघाने पाकिस्तानसमोर ३४३ धावांचे लक्ष्य ठेवले होते.

प्रत्युत्तरात पाकिस्तानचा संघ पाचव्या दिवशी २६८ धावांवर गारद झाला. पाकिस्तानकडून दुसऱ्या डावात सौद शकीलने सर्वाधिक ७६ धावा केल्या. तर इंग्लंडकडून दुसऱ्या डावात ओली रॉबिन्सन आणि जेम्स अँडरसन यांनी प्रत्येकी ४ विकेट घेतल्या.