Australian Open 2023: जोकोविचने विक्रमी १०व्यांदा जिंकली ऑस्ट्रेलियन ओपन! नदालची बरोबरी

सर्बियाच्या नोव्हाक जोकोविचने विक्रमी १०व्यांदा ऑस्ट्रेलियन ओपन जिंकली आहे. पुरुष एकेरीच्या विजेतेपदाच्या लढतीत त्याने ग्रीसच्या स्टेफानोस सित्सिपासचा ६-३, ७-६, ७-६ असा पराभव केला. अंतिम सामन्यात जोकोविचने शानदार सुरुवात करत पहिला सेट ६-३ अशा फरकाने जिंकला. दुसऱ्या सेटमध्ये दोन्ही खेळाडूंनी जोरदार झुंज दिली, पण शेवटी जोकोविचने ७-७ अशा फरकाने विजय मिळवला. 

तिसर्‍या सेटमध्येही त्‍सित्‍सिपासने पुनरागमन करण्‍याचा आटोकाट प्रयत्न केला, परंतु जोकोविचवर मात करू शकला नाही आणि जोकोविचने ७-६ अशा फरकाने सामना जिंकला. या विजयासह तो एटीपी क्रमवारीत अव्वल स्थानी पोहोचला.

ऑस्ट्रेलियन ओपनच्या अंतिम फेरीत पोहोचणारा २४ वर्षीय सित्सिपास हा दुसरा सर्वात तरुण पुरुष खेळाडू आहे. त्याआधी जोकोविचने २०११ मध्ये वयाच्या २३व्या वर्षी अंतिम फेरी गाठली होती. 

जोकोविचने १०व्यांदा ऑस्ट्रेलियन ओपन जिंकली. या ग्रँडस्लॅम स्पर्धेच्या अंतिम फेरीत तो १० वेळा पोहोचला आहे आणि प्रत्येक वेळी त्याने विजेतेपद पटकावले आहे. जोकोविचने २००८, २०११, २०१२, २०१३, २०१५, २०१६, २०१९, २०२०, २०२१ आणि आता २०२३ मध्ये विजेतेपद पटकावले आहे. २०२२ मध्ये, जोकोविच व्हिसाच्या कारणामुळे ही स्पर्धा खेळू शकला नव्हता आणि राफेल नदालने ऑस्ट्रेलियन ओपनचे विजेतेपद जिंकले.

जोकोविचने २२ वे ग्रँडस्लॅम जिंकले

ऑस्ट्रेलियन ओपन जिंकून जोकोविचने २२वे ग्रँड स्लॅम जेतेपद पटकावले आहे. त्याने १० ऑस्ट्रेलियन ओपन, दोन फ्रेंच ओपन, ७ विम्बल्डन आणि ३ यूएस ओपनसह एकूण २२ ग्रँडस्लॅम जिंकले आहेत. सर्वाधिक ग्रँडस्लॅम जिंकण्याच्या बाबतीत जोकोविचने राफेल नदालची बरोबरी केली आहे. नदालकडे २२ ग्रँडस्लॅम आहेत. त्याचबरोबर रॉजर फेडरर २० ग्रँडस्लॅमसह तिसऱ्या क्रमांकावर आहे.